Samhod festival 2024 orug na bibo
Ni Sonny Malate
LAGONOY, Camarines Sur --- Mientras na nasa huring termino na si Alkalde Delfin “JB” F. Pilapil, III bilang hefe ehecutivo kan banwa, orug na nagigin bibo, makolor saka maogma an celebrasyon kan Samhod Festival na nasa ika-15ng taon na ngonian.
Segun ki Ariel P. Nitullano, Spokesperson kan local na gobyerno, an Samhod Festival namundag durante sa panahon ni dating Alkalde Delfin R. Pilapil Jr., ama kan presenteng hefe ehecutivo.
An Samhod Festival ginigibo kada taon bilang pagtaong kahalagahan kan samhod (soft broom) na iyo an reconusidong producto sa irarom kan One Town-One Product (OTOP) kan gobyerno. Sa paagi kan sarong ordinansa kan Sangguniang Bayan, ini pig-institutionalize na pirang taon na an nakakaagi. An festival sustenido sa paghatak nin mga bisita asin turista sa banwaan na ini.
Ngonian na ika-15ng taon kan Samhod Festival, katuruwang kan LGU Lagonoy iyo an Sangguniang Bayan sa pamamayo ni Vice Mayor Jerry Jake R. Remoto, Dyego H. Pilapil/DYEGO Lagonoy, Ako Bicol Partylist, PNP, MDRRMO asin iba pang mga ahencias kan gobyerno asin NGOs.
An samhod gibo sa tinanom na sugbo (tiger grass) na nagtutubo sa dakol na barangay sa banwaan na ini. An paggibo kaini saro sa mga mayor na ginugunoan nin ganada kan dakol na residentes digdi. Huli sa marhay na calidad, ini an mabenta sa mga mercado asin pig-eexport kan mga local na entrepreneur asin negociante.
An ika 15ng taon na celebrasyon kan Samhod Festival gigibohon sa laog nin walong aldaw, magpoon sa Abril 25 hasta Mayo 2. An kafiestahan kan parokya ninda apostoles Santiago asin Felipe, mga santo patron kan Lagonoy, iyo an Abril 30 hasta Mayo 1 kaya ini dagdag na kolor sa festival.
Pigbuyagyag ni Nitullano na kada aldaw durante kan festival, man-iba-ibang activividades an gigibohon. Kabarale digdi an sports events, cultural presentation, trade fair, float parade asin street dancing competition, mural painting competition asin an CTP/DRRM/MAPEH Parade Competition na paparticiparan kan secondary schools sa Partido Area.
Yaon pa man an pagarayonan sa Binibinng Samhod Festival asin Little Miss Samhod asin paguwarapohan sa Poginoong Samhod 2024.
Magkakaigua man nin Service Outreach an Ako Bicol Partylist na bukas sa publico. Gigibohon pa man an 1st Partido Rescue Marathon kan man-iba-ibang banwaan. Apwera kaini, dakolon pang mga actividad an piglinyada na piglalaoman na dadagsaon kan residentes asin mga dayohan.
Sarong significanteng actividad iyo an competition sa pagcomposo kan Bicol na Lagonoy Hymn. An manggaganang piyesa magigin oficial na hymno kan banwang Lagonoy.
Sa mga hubenes yaon an presencia kan nagkakapirang banda. Yaon pa man an mga celebrity guest performers na sinda Sitti Navarro, Paul Salas, Zeus Collins asin Yeng Constantino. Sinda tampok sa mga separadong banggi kan festival na piglalaoman na mahatak nin rinibong mga paradalan.
An Samhod Festival saro sana sa mga tourism event na pigmamaigotan ni Alkalde Pilapil tanganing maparambong an turismo, cultura asin economia kan Lagonoy na sarong 2nd class muniicipality.
An banwaan nin Lagonoy mayaman sa mga tourist destination mantang ini may kadagatan, magagayon na baybayon, mga isla, water falls asin kabukidan. Dagdag pa kaini iyo an mantenidong paz y orden asin mga may mahohoyong boot na residentes.
Sa presente, huli sa nagdadakol na numero nin mga excursionista asin turista, nagburutwaan an mga bagong pribadong resort sa east coastal, north coastal asin magin sa hararaning barangay sa poblacion. An mga ini an nagcocomplemento sa mga existido nang mga estructura asin tourism destination sa banwang ini saka sa bilog na Partido Area.