San Jose BFP iguang bagong fire truck
- 6 days ago
- 2 min read
Ni Sonny Malate
San Jose, Camarines Sur --- Dakula an kaogmahan asin pasasalamat ni SFO2 Jonathan L. Boncodin, OIC Fire Marshall kan Bureau of Fire Protection (BFP) digdi sa pagkakaigua nin bagong fire truck para sa saindang estacion.
An bagong vehiculo nakonsiger sa saindang ahencia nacional sa asistencia kan BFP Regional asin Provincial Office asin local na gobyerno kan San Jose sa liderato ni Alkalde Jerold B. Peña. Sa ngonian igua nang duwang fire truck an BFP San Jose.
Ini iguang capacidad nin 1,O00 galloon nin tubig asin mas dakula sa enot nindang fire truck. Siring man, mas moderno, may completong accessories asin may halangkaw na capabilidad sa pag-ontok nin kasulo sa localidad patin pagresponde sa kataraid na banwa.
Manonotaran na an San Jose na sarong 3rd class municipality bihira man magkaigua nin kasulo. Kun igua man, ini saradit sana asin madaling nasisimbagan kan San Jose BFP asin pagrespode kan pagtaraid na fire station.
Segun ki Boncodin ngonian na tag-init nagkaigua nin nagkakapirang incidente nin saradit na grassfire sa barangay Dolo alagad ini marikas na nasimbagan kan oficina ninda. An nabanggit na lugar may bantaak na lugar na an doot madaling maalang kaya parating dinudukotan tulos nin kalayo.
Pig-aapreciar kan hepe an suportang pig-eextendir sa sainda kan gobyerno local sa paagi ni Alkalde Peña. Sa paagi kaini, nasasanggawad an pangangaipo kan oficina ninda sa tahaw kan limitadong fundo sa gobyerno ngonian.
Sa presente, an local na gobyerno nakatalaan na mag-alocar nin fundo para sa pagribay kan luma nang bubong kan saindang edificio. Piglalaoman man kan hepe na makakaguno nin fundo para sa pantry asin stock room sa likodan kan edificio ninda.
Dagdag ni Boncodin, an saindang oficina padagos na nakipagtabangan asin coordinacion sa Philippine National Police (PNP), Municipal Disaster Risk Reduction Management Office (MDRRMO) asin iba pang mga kapartner na ahencia.
Segun pa saiya, sustenido sinda sa pagpautob kan provisiones kan RA 9514 o Fire Safety Code of the Philippines sa mga establisemento comercial asin residential building. Ini tanganing mapangatamanan sa gabos na oras an buhay asin pagrurogaring.
Nagpagiromdom si Boncodin na kun mabakal nin fire extinguisher dapat magpaturo sa tamang paggamit kaini sa personahes kan tindahan. Sinabi niya man na an saindang personahes nagtataong tamang guiya sa paggamit kaini.
Mientrastanto, pigbuyagyag ni Boncodin na kan nakaagin Fire Prevention Month kan bulan na Marso, urog pa nindang pigtawan doon an kahalagahan kan paglikay sa kasulo.
Tanganing makaguno nin dagdag atencion, nagconducir sinda nin Feeding Program sa barangay, Zumba Competition asin Fire Fighting Olympics na pigparticiparan kan mismong taga San Jose patin ibang banwa.
Pigtawan doon kan OIC Fire Marshall na an saindang oficina nagpapautob kan maninigong pakikiiba sa mga cliente asin tamang serbisyo base sa mandato ninda na maiduhol an sarong de calidad na serbisyo sa publico.
An BFP San Jose Hotline number - - 09489212029.
Comments