SANTI SANTILMO

Tigsik ko ining si Dely Delubyo

Kataposan na kan bilog na mundo

Bitbit an yaman na paseguro

Sobrang gabat dae nakaabot sa Paraiso!

An yaman na kinulimbat tigsik ko man

Para kuta sa proyekto kan banwaan

Kan nagradas an baha sa kadagaan

Kaiba sa inatong si Congressman!

Tigsik ko an bilyones na fundo

Para kuta sa dakol na proyekto

Kan pigmakismakis naging multo

An remate iyo an publico!

An buayang sagrado tigsik ko man

Sobrang masiba mayong kabasogan

Saginsagin, honorable an pormahan

Ginibohan rebulto kan banwaan!

Tigsik ko si Boss na tampalasan

An pagkaraot mayong kasagkuran

An puso saka kalag naging kubalan

Kampon kan Diablo, sumbikalan!

Tigsik ko man si Santi Santilmo

Sa ginibong raot sa gobyerno

Kalag nagyayaba na sa mundo

Pighahatak na duman sa impiyerno!