top of page

Sarambayan, Orolay sa Karitela



Mayo nin lugar sa interong kinaban an inaapod na Maogmamng lugar, solamente an satuyang padangat na City of Naga ( sabi ni Louie Ortega, iyo ini an opisyal na pangaran kan lugar ta, City of Naga). An mga tawo maorogmahon asin maboboot, magka biristo sa lambang saro kaya sa pag layaw layaw sa Luneta asin Manila Zoo, maging duman sa Avenida, mabibisto an lalawgon nin taga Naga. Arog kaiyan an istorya nin Naguenio na sa pag halat nin malulunadan nin Bus sa Ali Mall duman sa Cubao o bagaman duman sa Domestic Airport, mahihiling an nag ngingirisi na mga taga Naga ta sinda magka biristo sa lalawgon asin sa apelyido. Sa mga bulugan nin payo asin sa mga tiripon arog kan Kantong Putikon, igua pirmi nin sarong kahapotan, Arin an maogma sa Naga? Kaidto o Ngonian?


Kaidto mayo pa kan mga modernong Mall, Supermarts, Resorts, Universities, asin mga darakulang edificios asin mga harong. Ngonian na panahon an mga infrastraktora sa Naga, kahawig na kan yaon sa Manila, asin an mga Hotel asin Restaurant kahawig naman kan mga yaon duman sa America. Gabos na klase nin masisiram na kakanon yaon na sa Naga, diyan sana sa Magsaysay, Diversion Road, asin sa Mayon Avenue, makukua an mga Restaurant nin mga luto na hawig sa Yuropa asin China. Simplihon an buhay kaidto sa Naga alagad matilam tilam ka sa siram kan buhay na mayo nin kahaditan o stress. Mayo pa kaidto nin SM, mayo pa an LCC, asin mayo pa an Emall ta an yaon kaidto iyo an makangalas na pinakadakulang saudan sa Asya, ini an Supermarket ni Ramoning Felipe. Magayonon magsaod sa Supermarket ta fresco asin darakula an sira na nababakal sa atado asin bakong sa kilohan. Kun ika nakamati nin gutom, maglakaw lakaw ka sa Carenderia section ta siguradong kakabiton ka kan mga magagayon na serbidora na nanurak na an hamok hale sa man iba ibang klase nin olor na pig hapulas sa leog asin sa takyag. Sa mga kakanan igua pa nin Juke Box, na puedeng paitokon an mga plaka ni Eddie Peregrina asin ni Victor Wood. Sa Naga kaidto, igua nin mga lugar na hawig sa Texas asin sa Las Vegas, arog baga kan inuman nin arak kan mga taga Texas, na an arak pig tatakad, asin iyan makukua man kaidto sa may tindahan ni Caramat sa sirong kan Supermarket ta an Gin pig tatakad “shot” na paboritong inuman kan mga parabuno nin orig, mga kargador asin mga para tienda nin sira asin mga hoyo asin samhod. Kun duman sa MGM Grand sikat an mga boksing na dinadayo nin mga Famoso asin mayayaman na tawo sa kinaban, igua man sa Naga nin pa boksing, asin ini yaon sa may mahiwas na tinampo harani sa tulay kan Tabuco sagkod Atlantic Bakery, na iyo an danlugan ni Ina. An mga boksingero kaidto sa Naga, diyan nag titiripon para mag burogtian. An kaibahan sa boksing sa Naga ta madaling maisihan kun maluya an tsibog kan boksingero ta ini madaling mapagal asin manluya. Sa boksing kaipuhan an masiram na pagkakan arog kan Igado, sabaw nin samsam, batag asin malotom, dai puede an pamahaw na pan desal asin kape, asin lalong dai puede an linabunan na kamoteng kahoy. Nabantog sa Naga an boksing sa may tulay kan Tabuco kan an sarong maskuladong boksingero tinamaan nin tikab sa istomago, tolos ining nag orohod asin nag agrangay sa saiyang korner, dai naghaloy ini nag suka, asin duman ilinuwa an sarong bandiadong pancit gisado na luto sa kariton sa Zamora. Kun duman sa Isle of Capri sa Italya, nag e-excursion an mga turista hale sa ibang nasyon, igua man kaiyan sa Naga, maogmahon kaidto mag swimming sa Jimenez Resort asin sa Penafrancia Resort na yaon sa Carolina ta malinigon an tubig hale sa bukid isarog. Puede man magdayo sa Magtabid ta dai pa kaidto abre an dalan sa Balogo asin Pongol. An mga sikat na kakanan sa Hongkong asin sa New York, kayang tampadan kan maogma asin maasong lugar kan New China Restaurant ta digdi yaon an pinaka masiram na pancit gisado sa kinaban, lalo ining minasiram ta tunay na laman nin karne an saindang bola-bola, marikas an serbisyo ta ipinapaagi sa kuribaw. Yaon man an masiramon na kape asin siopao sa Cosmos sa calle padian. Arog kan mga naka kurbatang empleyado sa Ayala Avenue na pag lunch break mina duman sa mga sikat na restaurant sa Makati, igua man kayan sa Naga na an mga de kurbatang empleado kan Kapitolyo, minakakan sa Rendezvous asin sa Holiday Hotel Restaurant. Sa pagka bangui kadakol nin Night Club sa Manila, asin digdi sa Naga, igua man kaidto nin Leonora El Simpatica sa kalye Igualdad asin puedeng magdayo sa Acacia Club sa Baras Canaman. Sa Manila naging Famoso an entertainment show na Student Canteen ninda Eddie Ilarde asin Laila Benitez, duman nadidiskubre an mga nag sirikat na singer sa Pilipinas, alagad sa Naga, kadakol an nag sirikat na singer ta Famoso man kaidto an karantahan sa Quezon Square. Si Nora Aunor, Neddie Decena asin si Imelda Papin anas produkto nin karantahan sa centro kan Naga. An kaibahan lang sa Quezon Square ta an contestant matapos mag perform tolos sinasabihan kan Announcer na, “resibihon mo an sarong bote nin Coca Cola” Kaidto an mga tawo garong turista arog kan mga dayuhan na namamasyar sa Fort Santiago ta sinda nagbabayad nin mahal makasangkay sana sa Kalesa para ilibot libot sa lugar na iyo an kampo kan mga kastila sa Manila. Digdi sa Naga, an mga gurang, orogmahon na minalunad sa Karitela tanganing mag saod. Sa laog kan karitela, maogma ang irestoryahan sa panginginot kan kutsero pero iba an isyu, kung duman sa Manila an pig oorolayan iyo si Marcos asin si Aquino, pero sa Karitela na biyaheng Abella, Santa Cruz asin Dayangdang ang pig oorolayan iyo an sarambayan sa baryo. Mayo pa kaidto nin mga tinapay na manlaen laen an timpla ta kaidto nagpapahingusto na an mga taga Naga sa masiramon na Pan Legazpi kan Quality bakery asin an mainit na pan desal kan Atlantic Bakery na dahil sa siram, pirila asin nag kukurahaw an mga parabakal. Iyan an saro mga rason kun tadaw an Naga inapod, An Maogmang Lugar.

Kommentare


bottom of page