Saro, Sararo



Dating Bicol Varsitarians, ginibong Sarong Banggi hali sa sarong famusong kansyon Bikolnon sa katuyuhan na magkasararo an gabos na Bikolano, mapadanay an kultura, estorya asin linguahe o tataramon kan mga Bikolano bilang pag-urgolyo kan mayaman na lugar na pig-aapod Kabikolan.


Sampulong mga juvenes hali sa Camarines Norte, Camarines Sur, Albay asin Sorsogon an nagtiripon sa sadit na sulong kataid kan bantugan na Baker’s Hall sa UP Los Baṅos sa okasyon kan Loyalty Day kan Universidad kan Oktubre 10, 1964.


An Bicol Varsitarians kaya compuesto nin mga taga-Bikol na estudyante sa UP kan dekada 50 asin amay na parte kan dekada 60. Mina-eleksyon kan mga opisyales, nagkakaigwa nin induction of officers, nabarabarayle sa sarong auditorium alagad kinaagahan an mga opisyales asin miyembros kan Varsitarians maski magsarabatan sa laog kan campus dai nagtitirinohan asin dai na magkabiristohan.


Kaya naisip kan 10ng SB founders kadto na gibihon ining kaburunyugan nin mga estudyante sa UPLB na garo magturugang an arapudan ngani Hermano asin Hermana.


Dara garo kan kapungawan sa pamilya ta harayo sinda sa saindang mga mahal sa buhay kaya sentimental asin emosyonal an mga miyembros kan Sarong Banggi.


An mga advisers pati kan Sarong Banggi kan panahon na idto na pig-aapod na socio-civic organization, sarong gobernador sa Bikol, sarong dekano sa UP Diliman asin sarong babaeng topnatcher University Councilor na ngunyan bantugan na negosyante sa enterong kinaban.


Maski kan enot dai pigreconucir an Sarong Banggi bilang student organization ta considirado ining “regional organization” na bawal kadto pero naguin aktibo an organisasyon ta may mga miyembrong university/college scholar, may mga staffer kan college publication, may mga opisyales kan student government, may mga champion na parakawat sa campus asin nanggagana sa mga debate asin oratorical contests an mga miyembros kaini.


Kadakol kan mga naenot na miyembros an naguin regional directors nin mga ahensya kan gobyerno, managers kan mga banko, mga alkalde nin banwaan, business editor nin dakulang diyaryo nasyonal


(Manila Bulletin), may nagpalakop kan Couples for Christ sa ibang parte kan kinaban, nagkampeon sa Rodeo, an ralaban kan mga animal science students dapit sa abilidad kan mga hayop arog kan mga kabayo, baka, damulag asin manok asin iba pa.


Naguin bantog pa an Sarong Banggi dahil sa mga aktibista, rebelde asin mga militanteng miyembros kaini. May dakol na nagkagaradan sa kabukidan.


Mala ta pigdara kan grupo an bantugan an Samahang Kamangyan kan Philippine College of Commerce o Polytechnic University of the Philippines sa Manila na nagpasali kan saindang talento sa entablado sa pagkumbincir sa publiko na mabuklat an mata sa mga nagyayari sa politika sa laog kan nasyon.


May sarong miyembro kan SB na naguin sikat na director, actor sa entablado ngunyan iyo na an pinakaeksperto pag-abot sa tanom na gumamela digdi sa nasyon o entero pang Asya.


Dakol na mga miyembros kaini an natawan nin awards sa pagprotihir kan kapalibutan bako lang sa Pilipinas kundi sa Canada asin Amerika. An saro naguin chairman kan Nataional Housing Authority.


Kun igwa nin mga aktibista, igwa man nin mga halangkaw na opiyal kan pulis asin army an Sarong Banggi pero maski nagkakasarabatan garo mayo sana. Igwang naguin coronel, igwa man naguin supremo kan mga rebelde sa sarong provincia sa luwas kan Bikol.


Kan dai na mapugulan an popularidad bilang organisasyon kan mga Bikolano, nagbukas na nin primerong sanga sa ciudad nin Naga, enot sa Ateneo asin UNC, nagbukas sa Guinobatan, sa ciudad nin Legazpi, sa Pili, sa Tabaco, sa Daet, sa Irosin Sorsogon asin sa Kamaynilaan.


Hasta nagburukas pa sa Polangui, sa Labo, sa Quezon Province, sa Ragay, sa BISCAST asin sa Partido.


Naguin sarong national organization, naguin international pa kaya igwa nin Sarong Banggi Philippines asin Sarong Banggi Organization International.


Pero maski siring mantenido an paguiguin humilde an mga miyembros kan grupo pero mantenido man an respetong itinatao sa kada miyembro.


Mayo ining politika asin dai nagpapagamit sa kiisay man na politiko o partido politikal sa laog kan labing 50 anyos kan Sarong Banggi na nabubuhay sa ibabaw kan kinaban.


May nagprobar man na barangaon ini, may nagprobar na patalsikon an ibang miyembros kundi napagkasunduan kan kadaklan na sa sarong pamilya na magturugang arog kan Sarong Banggi mayong na-eexpel o nagdedemitir o nagreresign sa paguiguin miyembro.


Apuera kan mga regular na miyembro sa mga campuses si mga nagtapos na o nagpondo na pag-adal naguiguin miyembros kan council of elders sa manlaen-laen na ciudad o campus.


Minsan huli sa distancia kan mga edad nagkakaigwa nin dai pagkaka-irintindihan an mga elders asin mga regulars. Alagad iyan gabos madaling maresolviran.


An Sarong Banggi iyo na an pinakadakulang socio-civic organization nin mga Bikolano sa anom na provincias asin pitong ciudades kan rehiyon asin sa enterong Pilipinas asin ibang parte kan kinaban.


Ano an sekreto? An motto kan SB kan Sarong Banggi: Sa Pagkasararo may Kusog! SPMK.