top of page

SARONG ALCALDE PIGRECLAMO SA VOTE BUYING: BSKE sa CSur matuninong - PNP

An Philippine National Police (PNP) sa Camarines Sur nagpahayag na ‘‘generally peaceful’’ si nagtapos na Barangay, Sangguniang Kabataan Elections (BSKE) kan Oktubre 30 afuera kan reclamo sa sarong alcalde na pigsasahotan kan awtoridad na envuelto sa vote buying.


An Camarines Sur mayong pigdeclarang barangay o banwaan sa ‘‘red category’’ sa ginibong BSKE sa tahaw kan naging higot an mga checkpoint kan lambang municipal police station.


Ini huli kan kaandaman sa seguridad kan kapupulisan na pigdestino sa gabos na mga voting center, amay na pagwarak kan PNP/Comelec checkpoint mantang yaon an mga nakasibilyan na awtoridad na an saindang misyon iyo an ‘‘Kontra Vote Buying, Vote selling’’, sabi ni PNP Camarines Sur spokesperson P/Major Maria Victoria Abalaing.


An alcalde na pigrereclamo sa vote buying asin saiyang pag-iriba iyo si Jun Jun Zorilla kan Bato, Camarines Sur na an insidente nangyari sa Barangay San Vicente.


Alagad an alcalde nagpahimotik kan acusasyon kan awtoridad envez pigrereclamo niya apesar na mga nakasibilyan armado nin armas kaya saiyang pigsita, binaliktaran lugod siya nin vote buying.


An mag-ibong na lado parejong nagpa-blotter nin kanya-kanyang bersyon sa Municipal Police Staion.


Saro pang insidente sa sarong precinto sa barangay Bulwang, Baao, Camarines Sur mientras na nagboboto an pigngaran na Richard Borina, 38-anyos biglang nadismayo na tolos inaragapan dinalagadan sa hospital sa Ciudad nin Iriga alagad binawian nin buhay huli sa helang sa puso.


Sa Comelec Camarines Sur, si Atty. Noriel Badiola, provincial election supervisor nagpahayag na an marhay na coordinasyon asin suporta kan PNP, Philippine Army, Bureau of Fire Protection maging Philippine Coast Guard dakulang bagay nganing matuninong si paz y orden an nagtapos na pirilian.

Comentarios


bottom of page