top of page

Sarong decadang pagtinaktinak sa golden rice, piggiromdom

Pigselebrar kan sektor nin paraoman an sarong decadang pagkakasararo nganing wasakon an golden rice sa laog kan laguerte kan opisina rehiyonal kan Department of Agriculture sa Barangay San Agustin, Pili, Camarines Sur.


Kan Martes, Agosto 8, 2023 nagkaigwa nin simpleng actividad an grupo kan Kilusang Magbubukid ng Bicol KMB asin iba pang progresibong grupo na ginibo sa Oas Community College asin nagkaigwa nin diyalogo sa LGU kan Ciudad nin Ligao.


Nangyari an paglaog kan progresibong grupo sa laguerta kan DA kan Agosto 8, 2013 kan saindang garaboton asin tinaktinakan an mga tarok kan golden rice na mayo man naginibo an mga awtoridad mantang dai na nagsangat nin caso contra sa grupo kan paraoma.


Nabigla an mga security guard sa laog kan DA compound alagad mayo man nangyaring pangongolog sa mag-ibong na lado.


Ipinaheling kan KMP Bicol an saindang pagkakasararo sa actividad na saindang orgulyo an insidente kan 2013 bilang protesta na daing kasegurohan sa epekto sa salod an pinag-aadalan sa golden rice.


Pigdedenuncia an gobierno sa pagprobar na palakopon an golden rice mantang pigsasabi ninda na igwang epekto ini sa salod asin kapalibotan.


An grupo kan SIKWAL GMO saro sa nangenotan sa protesta kan 2013 contra sa ahencia nganing isikwal an bagong banhi nin paroy.


Nahahadit an grupo kun ipapadagos an pagtanum kan golden rice magdadara sana nin kontaminasyon sa mga banhi orog na sa mga katutubo asin tradisyonal na banhi nin mga paroy sa satong nasyon.


Huli kan pagkakasararo kan grupo nagpaluwas nin desisyon an Corte Supreman kan Abril 19, 2023 sa pag-isyu nin ‘‘Writ of Kalikasan’’ asin na may base an pagcontra kan sektor nin paraoma.

留言


bottom of page