Sarong soldados kan PA gadan sa encuentro vs mga rebelde

Pili, Camarines Sur --- Liwat naman nagkaigwa nin encuentro an tropa kan gobierno asin rebeldeng New People’s Army, saro an gadan sa lado kan militar mantang an mga armas kan rebelde nabawi kan mga soldados na nangyari kan Lunes, Marso 20, 2023 sa Barangay Villahermosa, Cawayan, Masbaste.

Ipinahayag na antes nangyari an bakbakan nakarecibe nin impormasyon an tropa kan 2nd Infantry Battalion na nagkaperang mga armadong Communist Terrorist Group (CTG) an nasiripan na nang-hahangilid sa sinambit na lugar.

Dahilan kaini, naglansar nin operasyon an mga soldados kan 2IB sa kaparejong lugar na kun saen saindang nasagupa an maabot sa doseng miembro kan CTG sagcod na nagkaigwa nin encuentro sa laog nin limang minuto alagad saro an binawian nin buhay sa lado kan gobierno na si Cpl. Antonio Parreno Jr. mientras na sa lado kan mga rebelde sa saindang mga inagihan mantang nagdudulag igwa mga nagwarak na mga dugo.

Nagkaperang mga armas na nawalat kan mga rebelde an nabawi kan militar na kinababalihan nin sarong R4 assault rifle; sarong improvised pellet gun; tolong cellphones; duwang AP mines; sarong binocular; duwang improvised explosive device; apat na blasting caps, IED wires asin iba pang mga personal na kagamitan kan mga rebelde.

Kasunod kan mamundong bareta sa tropa kan gobierno, tolos man nagpaabot nin pakikidamay si Major General Adonis Bahao, Commander kan 9th Infantry (Spear) Division, Philippine Army asin Joint Task Force Bicolandia sa familia kan biktimang soldados mientras nagseguro nin justicia an heneral sa pagkakagadan kan saindang soldados.

‘‘Ako po, sampu ng buong pwersa 9th ay taos pusong nakikiramay sa naulilang pamilya ni Cpl Parreno, alam ko po na hindi madaling tanggapin ang nangyari ngunit tinitiyak po ng JTFB na hindi masasayang ang pagbubuwis niya ng kanyang buhay’’, sabi kan jefe kan 9th ID.