SB kan Pili, CSur naglinaw sa isyu sa pagbawi kan P50-M

An cuestionableng kahagadan ni Alcalde Tomas Bongalonta kan Pili, Camarines Sur na naghahagad sa Sangguniang Bayan nganing tawan siya nin awtorisasyon sa pagpirma sa memorandum of agreement (MOA) sa Philippine Games Amusement and Gaming Corporation (PAGCOR) sa idodonar na P50-M iyo an dahilan na igilid muna an pagpasar kan resolusyon.

Haloy na an isyung ini alagad sa paliwanag ni Consejal Efren Amesola, kabale sa mayoriang miembros kan SB an kahagadan kan jefe ejecutivo para sa idodonar na multi-purpose bldg. kan PAGCOR na may cantidad P50-M alagad kaipuhan an resolusyon na nag-aawtorisar sa saiya na magpirma sa MOA sa iimplementar na proyekto.

Huli sa kawaran nin MOA, binawi kan PAGCOR an proyekto na magagamit pa bilang evacuation center.

Naging cuestionable sa sainda an urulay sa donasyon tano ta kabale pa an hinahagad na kondisyon kan madonar nin lote sa brgy. Cadlan na dapat magpa-konstruhir nin school building asin kapilya an LGU sa laog kan 500 metros cuadradong lote na idodonar kan sarong organisasyon.

An lote hale sa idodonar kan Congregation of the Mission na pinamamayohan ni Fr. Ruel Ruelos.

Pigbuyagyag pa ni Amesola na pigcuestion ninda an kahagadan kan alcalde mantang igwang nagrereclamong mga benipisyaryo kan lote, dai sinda nag-kokontra sa proyekto kun mayong problema, sabi pa kan consejal.

Kun tano ta dapat ibalyo an proyekto sa lote na sadiri kan Capitolio Provincial, saiya pang sinabi na si Congresista LRay Villafuerte iyo an naghagad nin tabang sa PAGCOR.

An mayoriang miembros kan SB kaalyado ni Gobernador Migz Villafuerte mantang sinda Consejales Narcel Lopez asin Francis Belen iyo sana an kasurog kan jefe ejecutivo. (dpa)