SB San Jose iguang apat na KBL

Ni Sonny Malate

SAN JOSE Camarines Sur --- Ngonian na panahon kun saen parehong  costoso an pag-aki asin pagpahumali, iguang mga programa an gobyerno mismo asin elehedong oficiales tanganing  masimbagan an pangangaipo kan publico dapit digdi.

Sa banwaan na ini, enot na nagtugdas kan programang midbid sa apod na  KBL o Kasal, Bunyag,  Lubong si dating Konsehal Hassan Durante. An programa nag-eextender nin libreng serbisyo nin vehiculo durante sa kasal, bunyag asin lubong. Parating pigpoprobetsaran kan residentes iyo an sa lubong o intierro.

Sa presente, an mga miembros kan Sangguniang Bayan (SB) digdi na may kaparehong programa iyo sinda Konsehales Marsan Durante, "Notnot" Chavez, Gerry Bodollo asin Juancho Ras. Ini apwera  sa kaparehong programang gikan sa oficina ni Alkalde Jerold B. Peña.

Alagad iba sa naenot na programa, an presenteng serbisyo social na ini may dagdag nang  serbisyo arog kan sa excursion, graduation pangubas asin ibang pangangaipo nin libreng transportation sa laog kan banwa asin kataraid na localidad.

Segun ki Konsehal Ras, siya namotivar na mag-initiar kan arog kaining programa huli sa experiencia niya bilang punong barangay sa laog nin 12ng taon. Dagdag niya an realidad kan kapagtiosan sa barangay namamati durante sa bilog na pagkabuhay hasta sa paghuhumali sa kinaban.

Apwera sa libreng transportasyon sa pag-intierro, may kairiba pang tulda o tent na gamit sa paglamay. Apod kan programa niya - ''Serbisyong Ano man Panahon, Ano man Okasyon"

Pigbuyagyag man niya na siya asin pag-iribang konsehales dae nagtatapos an pag-asiste sa nagmumundong pamilya sa paagi nin libreng serbisyo sa transportasyon sana.

Imbis, magkaminsan sinda minagawgaw  pang financial o material na tabang bilang pakikisumaro sa tios na pamilya. Namati niya na totoong makaherak an sarong pamilya na deficil.matawan nin decenteng pagpapahumali an mahal sa buhay.

Sa presente, sinda Chavez asin Durante may tigduwang dyip na nag-eextender nin libreng  sakay.  Si Ras asin Bodollo igua man tigsaro. Kun kinukulang huli sa sarabay asin dakulang pangangaipo, sinda Ras asin Bodollo minagamit pa kan ibang sadiring vehiculo.

Segun ki Ras, kadaklan na beses siya asin pag-iriba niyang konsehales iyo mismo an nagmamaneho kan vehiculo. May mga beses man na sa laog nin sarong aldaw haros kada saro sainda may tigtorolong gadan na pigseserbisan.  

Sinabi niya pa sindang apat an nag-uurulay tanganing maserbihan an pangaipo kan residentes. Siring man,  an eskedyul kan kada saro pinapatama tanganing maacomodar an dakol na kahimanwa.

Piglinaw man ni Ras na sindang apat na miembros kan SB patin si Alkalde Peña dae naghihiling nin color politica sa programang ini.

Dagdag pa niya sa paagi kan programang saiyang pig-initiar personal niyang nahiling an mga tawong maninigong tabangan. Namate niya man  an tunay na espiritu kan pagserbi sa .mga namamanwaan orug na an mga tikapo sa buhay.