SB tagulnod sa evacuation center project kan PAGCOR

Nanghihinayang an mga residente kan Pili, Camarines Sur matapos ibasura kan Sangguniang Bayan an resolusyon na mag-aawtorisar sa alcalde kan banwaan na ini nganing pirmahan an kasundoan sa Philippine Amusement Gaming Corporation (PAGCOR) sa ipapatindog na P50 milyon na evacuation center sa barangay Cadlan.


Si Alcalde Tomas Bongalonta nagpahayag na nagcierto sa saiya an presidente asin chief operating officer, abogado Alfredo C. Lim kan PAGCOR nganing magpakonstruhir kan duwang escalon na evacuation center sa saindang banwaan.


Alagad kaipuhan sana an sarong resolusyon kan SB para sa kasundoan sa iimplementar na proyecto na magagamit kan apektadong residentes kun igwang calamidad komo evacuation center, alagad dai inaprubaran kan mayoria sa miembro kan consejo na contra partido kan jefe ejecutivo lokal sa dahilan an gustong mangyari ibugtak sa laog kan laguerta kan Capitolio Provincial.


Sinda consejales Francis Belen asin Narcel Lopez iyo sana an nagtulod na dapat aprubaran kan resolusyon alagad dai sinuportaran kan mayoria sa miembros kan SB.


Sinabi pa ni Bongalonta na igwa nang donasyon kan lote sa barangay Cadlan na hinahalat nalang kan PAGCOR nganing magtalaan nin ground breaking ceremony para sa proyecto mala ngani langkag na si Atty. Lim mayong resolusyon na nakaabot sa saiyang opisina.


Namundo an jefe ejecutivo huli ta dai sinda nakasabay sa mga ground breaking ceremony sa banwaan kan San Jose, Sagnay, Ocampo asin Tigaon mala ngani tinao na sa mga LGUs an inisyal na P25 milyon o 50 por ciento kan P50-M nganing punan na an konstruksyon kan saindang evacuation center.


An tsikie tinao ni Lim sa apat na mga alcalde sa ginibong sunod-sunod na ceremonya para sa proyecto kan evacuation center.


Sinabi ni Lim sa saiyang mensaje an proyecto kan PAGCOR kabale sa mga prioridad kan Duterte administration sa mga lugar na parating inaagihan nin calamidad.


An Department of Public Works and Highways iyo an nag-designed kan evacuation centers na kayang isabat sa 250 hasta 300 kph na kusog nin bagyo.