top of page

School principal puedeng magsuspendi nin klase

Igwa nin directiva an Department of Education (DepEd) sa principal sa automatic suspension kan mga klase sa escuelas publica kun igwang maraot na panahon alagad si mga suhay na insidente kun igwang pinapaluwas na anuncio sa LPA an Philippine Atmospheric, Geophysical and Astronomical Services Administration (PAGASA) na pueding gikanan nin mga pag-uran sagcod na maresulta sa pagbaha dawa mayong orden an halangkaw na opisyal kan DepEd an school head o principal awtorisidado na magsuspendi.


Ini nakapalaman sa DepEd Order No. 37 sa tahaw kan mga insidente nin suhay-suhay na mga pagbaha dawa mayong calamidad o bagyo huli kan halawig na mga pag-uran madaling nalangkaw an tubig baha.


Si City School Division Superintendent Manny De Guzman kan Ciudad nin Naga nagpahayag kaini sa entrevista kan Bicol Mail mantang sunod-sunod si mga pagbaha kan nakaaging bulan nin Deciembre 2022 dawa mayong anuncio sa bagyo an PAGASA.


Kun padagos an pagbulos nin uran asin namemeligro an mga tubig baha dawa mayong bagyo, an principal puedeng automatic na magpaluwas nin suspension kan klase, sabi pa ni De Guzman.


Kabali pa digdi si halawig na mga brownout kan cooperativa nin electricidad na apektado an pag-klasi sa classroom.


Alagad kaipuhan man giraray magsurat sa pamayo kan DepEd maging sa jefe ejecutivo sa sarong lokal na gobierno dawa huri an importante iyo an ‘‘welfare’’ kan kaakian, sabi pa ni De Guzman.


Bako lang kan bulan nin Deciembre 2022 an mga nangyaring tubig baha maging ngunian na bulan na Enero 2023 an ibang LGUs nagpaluwas kan saindang suspension sa klase dawa mayong bagyo alagad igwa man nin ibang principal an dai na nahalat kan official suspension kan LGU envez nasadiri na nganing dai makauyo an mga estudiantes sa paglaog sa klase.


Maging si DepEd Regional Director Gilbert Sadsad kan DepEd Bicol nagkunfirmar sa automatic suspension kan mga principal na puedeng magdesisyon kun ini kinakaipuhan.


An PAGASA amay nagpapaluwas nin anuncio sa kamugtakan kan panahon orog na kun igwang nagdadangadang na LPA. (dpa)

Comments


bottom of page