Search and retrieval team kan Bicol PNP pinadara sa Samar

Nagpadara nin 35 miembros kan Philippine National Police (PNP) an Camp Semion Ola, Ciudad nin Legazpi sa PNP Provincial Office kan Samar nganing magtabang sa search and retrieval operations sa mga nawawara pang residentes sa ibang banwaan sa provincia nin Samar na apektado kan mga landslide kan maglamasa an bagyong Agaton.

An police provincial office kan Samar asin local government unit iyo na an bahala kun saen madedestino an team kan Bicol PNP nganing magin katuwang sa nagpapadagos pang search and retrieval operations sa mga biktimang residentes kan landslide.

Si Police Major Malou Calubaquib, opisyal na parataram kan Camp Semion Ola nagpahayag na may pinadarang miembros kan PNP kasunod kan order ni Brig. Gen Jonnel Estomo, jefe kan Bicol PNP na maninigo magtabang an saindang fuersa sa mga biktima kan calamidad.

Afuera pa kaini, nagtitipon mga donasyon an liderato ni Estomo nganing magpadara pa sinda nin relief goods sa ginatos pang familia na nagkukulang an suplay nin pagkakan sa evacuation center.

Dai nagtalaan nin panahon kun perang aldaw an 35 miembros kan Bicol team alagad magdedepende sa operasyon kan Municipal Disaster Risk Reduction Office kan provincia asin LGUs sa sinambit na provincia.

Nagpadara pa nin Water Lorry Truck an Camp Semion Ola mientras na apektado pa an suplay kan tubig sa Samar nganing makatabang sa pagkulang kulang suplay nin tubig maging sa evacuation center. (dpa)