Seguridad sa pagkakan simbag sa ‘recession’
SEKTOR NIN AGRICULTURA DAPAT TABANGAN KAN GOBIERNO
Kasunod kan privilege speech ni Diputado Gabriel H. Bordado Jr. sa pangapodan na dapat pag-andam an pighahadit na global recession sa 2023, si dating Consejal Julian Lavadia Jr. nagpahayag na napapanahon an mga ponto kan representante kan tercer distrito kan Camarines Sur na kaipuhan mag-andam an gabos sa tahaw kan padagos na paglangkaw kan prime commodities sa mercado asin iba pang produkto.
Alagad dapat suportaran finansyal kan gobierno an sektor nin agrikultura nganing mas halangkaw an produksyon asin dai ma-aapektaran kan ‘‘inflation’’.
Sa harahalabang privilege speech ni Bordado saro sa saiyang mga pig-recomendar sa House Speaker asin mga pag-iriba sa Camara-Baja iyo an pagpakusog sa food production na dakulang tabang sa economia asin magkakaigwa pa nin food security.
Si dating Consejal Julian Lavadia Jr., Consultant kan City Agriculturist Office kan City Hall asin namamahala kan Mega Bicol Organic Farm School, nakapalibot sa saiya an mga paraoma mantang pinapaliwanag an protocol sa organic farming nganing ciertong halangkaw an produksyon nin paroy asin gulayon.
Kabali pa an ciertong suporta kan mga LGUs na ngunian na taon naglangkaw an saindang narerecibing national tax allotment huli sa Mandanas-Garcia ruling. Gamiton an fondo sa ‘‘credit, crops storage, processing, transportation, marketing, trading support and other program activities in the rural areas’’..
Kun halangkaw an produksyon sa agrikultura ciertong daing gayo apektado an Filipinas, mabarato pa an presyo asin dakulang tabang pa sa mga paraoma.
Kun masusunod sana an protocol sa organic farming magastos sana nin P10K hasta P15K mientras na puede pang mag-triple an produksyon nin paroy maging gulayon alagad sa mga naggagamit nin sentitikong abono asin kemikal inaabot nin P30K hasta P35K, sabi pa.
Segun sa datus an Filipinas nag-aangkat nin nasa 40 por ciento kan produkto agrikultural.
Si Lavadia, Consultant kan City Agriculture Office asin haloy nang advocacia an ‘‘organic farming’’ mala ngani nagbugtak nin sarong escuelahan para sa paraoma sa Brgy. Panicuason na iyo an Mega Organic Farm School.
Dai sinda nagsisingil nin matricula sa ‘‘major subject’’ pigtutukdo an dapit sa agricultura kun panong mapapalangkaw an produksyon kabali na an organic farming.
Si Lavadia igwang programang ‘‘Asenso Agrikultura’’ sa DZOK-FM cada aldaw nin Sabado alas 9:00-10:00 nin aga na mayormenteng nakatutuk an programa sa pagpa-asenso kan sektor nin paraoma.
Saiyang pighalimbawa sa lado nin pag-nenegosyo maging sa gobierno an inaapod na ‘‘return of investment’’. Dawa nagtagama nin dakulang fondo an gobierno sa sektor nin agrikultura kabali na si mga parasira makakabawi asin asensado pa an sinambit na sektor.
An IMF nag-alerto na kan piglalaoman na global recession sa masunod na taon asin cierto dai makakasalbar digdi an Filipinas, sabi kan mga expertong economista
An padagos na paglangkaw kan produkto nin petrolyo, giyera kan Russia laban sa Ukraine saro pa sa napapabagsak kan economia sa kinaban, sabi pa ni Bordado.
Mga produkto lokal, delata, asin iba pang mga mayor na barakalon halangkawon na an presyo sa ngunian. (DPAureus)