Sektor nin trimobile vs sa ‘‘tigil pasada’’
Sinikwal kan sektor nin trimobile sa Ciudad nin Naga an hagad kan grupo nin transporte na magparticipar sinda sa ‘‘tigil pasada’’ o juelga para sa mahiwas na protesta nganing huroton sa gobierno na mabawasan an nagpaparalangkaw na presyo sa produkto nin petrolyo.
Si Domingo Parlaje, presidente kan Federation of Trimobile Operators, Drivers Association (PETODA) sa Ciudad nin Naga asin Manager kan Piston Development Cooperative nagpahayag na ano man na planong juelga kan transporte dai sinda interesado na magparticipar.
Saiyang pinaliwanag na dai man kontrolado kan gobierno an pagparalangkaw kan produkto nin petrolyo huli ta an nagdidikta kan presyo iyo an mercado internasyonal.
Nakakapagabat sa isyu sa petroleum product iyo an oil deregulation law na kun haen an mga kompanya sinda an nagdidikta kan presyo bako an gobierno. Maging man an excise taxes saro man sa problema.
An mga lideres kan sektor nin transporte sa National Capital Region iyo an nag-aalok sa mga provincia na magsabay sinda sa nationwide strike nganing matanyog an gobierno mantang an administrasyon ni Presidente Rodrigo Duterte dai nag-gigibo nin aksyon.
An ibang grupo kan sektor nin transporte suportado an panindugan ni Congresista Gabby Bordado kan tercer distrito kan Camarines Sur na magpaapod nin special session an Congreso nganing urulayan an isyu sa pagsuspende kan excise tax.
Si Bordado nagpahayag na maninigo na suspendiron ngona an excise tax sa produkto nin petrolyo nganing matawan nin solusyon an pagparalangkaw kan presyo.
Nagkapera nang mga lehislador an nagsusuporta na suspendiron an excise tax nganing matawan solusyon an problema sa halangkaw na presyo kan sinambit na produkto.
Sinabi pa ni Bordado sa tahaw kan haros cada semana padagos an paglumpat kan presyo maninigo nang magpa-apod nin special session si Duterte nganing matukaran an isyu.
An padagos na kariribokan sa Russia asin Ukraine iyo an causa asin mismo an mga kompaniya nin lana an nagpapahayag igwa pang masunod na patong sa presyo sa tahaw kan padagos na paglangkaw kan presyo sa mercado internasyonal kan lana. (dpa)
Nagpipirila an mga motorista maging an PUJ asin trimobile sa mga gas station sa Ciudad nin Naga puon alas 7:00 nin banggui abot matanga nganing magbakal nin amay kan produkto nin petrolyo asin dai na magpaabot sa ika-sampulong semana sa paglumpat kan petrolyo kan Marso 8. (Engr. Ronalyn Bondoc)