Selebrasyon sa mga brgy fiesta, limitado - CCCOM

An bulan nin Mayo iyo an mga fiestahan sa barangay alagad huli kan pandemya dapat limitado an saindang actividades mantang nagsusunod sana an Archidiocesis nin Caceres sa mga reglamento kan Inter-Agency Task Force (IATF).


Mayong mangyayaring burongahan sa selebrasyon kan mga fiestahan sa barangay asin dapat iimplementar kan opisyales de barangay asin kan simbahan an health and safety protocols.


Si Padre Louie Occiano, director kan Caceres Commission on Communication (CCCOM) nagpahayag na ini an dapat masunod kan mga parokya sa tahaw kan padagos pang paglangkaw kan coronavirus disease (Covid- 19).


Suspendido an mga tradisyonal na prusesyon sa barangay envez an pagkaigwa na sana nin misa sa kapilya alagad an pabunyag sa omboy dapat gibohon sa parokya kan sarong banwaan.


Dapat estrictong ipasunod an 50 percent capacity kan mga nag-aatendir sa misa sa kapilya, sabi pa ni Occiano.


Sarong taon asin duwang bulan na an pandemya mantenido kan simbahan an pagsunod sa reglamento kan IATF mala ngani suspendido si nakaaging actividades sa Peñafrancia fiesta 2020 maging si mga kapiestahan sa gabos na parokya sa mga banwaan.


Maging sa mga banal na misa pinapaagi na sa live streaming mantang limitado an dapat mag-atendir sa simbahan nganing masunod an social distancing.


An mga barangay council padagos man nindang suspendido an actividad na pigpaparticiparan nin mga jovenes asin residentes kan barangay kabale na digdi si handaan sa pagkakan. (DPAureus)