Semana Santa asin politika



Garo na baga nagkaburutasan sa kwadra asin tangkal an mga tao na nakaruluwas pasiring sa tinampo, palaog sa mga simbahan, nagsirimba, nag-iba sa prosisyon, nagsamba sa Mahal na Diyos.


Dakul man nakapasyar sa mga baybayon, sa mga swimming pools, nagpa presko asin nag-orogma.


Kadakul mga balikbayan asin turista, lokal asin dayuhan an naka-bwerilo pagbiyahe pasiring sa mga provincia asin mga tourist spots.


Temporaryomenteng nagkarilingawan an Covid asin politika. An mga taong halop sa simbahan asin sa Mahal na Diyos nakaguiromdom sa saindang pagtubod asin tradisyon sa relihiyon orog na sa simbahang Katoliko.


An mga ciudades arog kan Naga, Legapi asin Iriga bako lugod matawo maski sa mga centro, pinto an mga negosyo sa aldaw na Viernes Santo, Sabado de Gloria asin Paskong Pagkabuhay.


An mga taga-Metro Manila mina-uruli sa provincia tanganing makisumaro sa pamilya, mag-orogma sa mga magagayon na lugar, magcelebrar kan Semana Santa ada-adang dakul an pista opisyal asin mayong trabaho sa opisina.


Paranu-pano an mga simbahan, gulpi an nag-iba sa prosisyon kan Miyerkules Santo, Viernes Santo asin Paskong Pagkabuhay. Nangyari an bagay seguro huli sa duwang taon nagkaralaom an mga tao sa saindang mga harong bunga kan Covid pandemic.


Naguin mahigpit an gobyerno sa mga protocols arog kan facemasks asin faceshields, physical distancing asin pagpabakuna. Kundi ngonyan bago mag Semana Santa nagtugak an gobyerno sa mga pagbiyahe hali sa ibang nasyon asin hali asin pasiring sa man-iba-ibang parte kan Pilipinas ta nagbaba na, sa herak nin Mahal na Diyos, an mga bilang nin kaso kan tinatamaan (nag-positive) o nagagadan kan helang na dara kan dai naheheling na Corona Virus 19 asin manlaen-laen na variants.


An virus lakop sa enterong kinaban pati mga mayayaman na nasyones arog kan Amerika, Australia, Europa, pati sa pinaka-dakulang nasyones kan kinaban na Thina asin India.


Digdi sa Asya bako lang Pilipinas an tinamaan kundi pati Vietnam, Singapore, Hongkong, Indonesia asin iba pa.


Nag-ontok kan ekonomiya sa kinaban. Sa Pilipinas dakul nawaran nin trabaho asin an report sa telebisyon gulping nawaran nin trabaho asin pagkakan.


An mga tsuper soboot nagkikirilimos sa mga tinampo naghahagad nin pagkakan. Nagmahal pa an presyo kan krudo asin gasolina dahil sa giyera sa Ukraine, nagrulumpat an presyo kan mga barakalon sa merkado pero mangalas kamo ta grabe an trapik sa tinampo ta nagparadakul lugod an mga lunadan siring kan kotse, SUV, motorsiklo, trimobile, e-trike maski mga para-padyak sa tahaw kan pandemic.


Nadungagan pa kan karampanyahan en preparasyon kan nagdadangadang na eleksyon sa Mayo 9 na apesar na ibinabawal an kampanya sa harong-harong (apuera ki VP Leni na nagsasadol sa mga volunteers na mag-haouse to haouse campaign sa pag-asegurar kan kapang-ganahan kontra sa front runner na si BBM).


Sa heling ko mas magastos an kampanya sa politika kesa mga bulong, mga gamit kontra sa Covid asin iba pang helang hali sa kaban kan gobyerno.


Pero huli ta napapalaman sa ley asin nakatalaan an eleksyon presidential asin lokal sa maabot na Mayo 9 padagos an aktibidades politikal, pahunod ngani an mga simbahan sa paghigpit kan gobyerno nganing dai maglakop an mga helang pero an mga politiko sige an rilibot, sige pa an pang-abrasa, sige an pang-kugos, sige pang hadok sa mga omboy, sige pa an pan-sekretong tao nin pondo sa mga lideres asin botantes maski bawal an vote buying o pagbakal nin boto.


Semana sana an pig-bibilang eleksyon na. Pakatapos kan Banal na Semana balik sa politka asin karampanyahan sagkod pagratak sa mga kalaban.


Hali sa pag-pamibi pasiring sa mga platika asin pasaluib sa ngaran nin politika. Lilingawan na naman si mga pangako na guinibo kan naka-aguing Semana Santa, hali sa paghorop-horop pasiring sa pag-atake sa kapwa manggana sana sa maabot na pirilian.


Aber daw masdan ta kun ano an kaabtan sa maabot na pirilian kan hiro-hiro kan mga Pilipino durante kan panahon nin pagsamba asin nin pagsimba sagkod sa panahon na an Diyos kan tao iyo an KUARTA sa lindong nin maating politika.