Senator de Lima dapat paluwason na sa carcel, hagad kan BAYAN

Dapat magdalagan na an justicia nganing paluwason na sa carcel si Senador Lelia de Lima na sinangatan nin mga gibo-gibo caso sa ilegal na droga kan gobierno sa presenting administrasyon Duterte, sabi kan Bagong Alyansang Makabayan (BAYAN) sa Bicol.

Ini kasunod kan pagbaliktad na kan duwang mga ‘‘key witness’’ na nagbuyagyag sinda diniktahan sana kan Department of Justice.

An BAYAN Bicol nagpahayag na si de Lima, limang taon na sa carcel alagad atrasado an dalagan kan justicia na posibleng intensyon kan gobierno saka nasisilag na digdi an inaapod na ‘‘Justice Delayed Justice Denied’’

Ini an an mga pahayag ni BAYAN spokesperson James Casilihan mantang mapaluwas sinda kan official statement pakatapos kan eleksyon nasyonal asin lokal.

Nagluluwas na mga gibo-gibo sana kan gobierno an sinangat na mga caso sa ilegal na droga contra ki Senador Lelia de Lima nganing paluwas kan gobierno na desidido sinda sa giyera laban sa droga asin takopan an mga nangyayaring ‘‘extra judicial killing’’ sa presenting administrasyon.

An mga ‘‘key witness’’ na nagbawi na kan saindang testimonia sinda Rolan Kerwin Espinosa na acusado sa ilegal na droga asin envuelto sa mahiwas na transaksyon sa droga sa Eastern Visayas saka si dating Officer In Charge Rafael Ragos kan New Bilibid Prison, na parejong nagbuyagyag na diniktahan sana sinda kan Department of Justice nganing ipiton an senador sa caso sa ilegal na droga.

Tinutokdo ni Ragos iyo si dating DOJ Secretary Vitalliano Aguire, alagad nagpahimotik sa akusasyon kan dating OIC kan Bucor.

Sinabi pa kan BAYAN Bicol saindang kinukundenar an arog kaining manipulasyon kan gobierno, pano na palan si mga pobreng namamanuan na inosente sa caso.

Si de Lima re-electionistang senador sa ticket kan Robredo-Kiko tandem alagad dai nakabuelong magkampanya mantang padagos na detinido sa carcel.

Naglalaom an BAYAN na pakatapos kan presenting administrasyon matatawan nin justicia an Bicolanang senador. (dpa)