Senior citizen sa Ragay, CS iguang dugang na biyaya

Tinawan prayoridad ngunian na enot na semana kan Enero 2026 an mga Senior Citizens kan lokal na gobierno kan Ragay, Camarines Sur nganing magpasar nin ordinansa na matawan nin dugang na biyaya an sinambit na sektor.

Inaprubaran ni Alcalde Benchie ‘‘BGH’’ Horibata an ordinance No. 18, S. 2025 o ‘‘Benefit-Gap Harmonization Ordinance for Senior Citizens of Ragay’’ na padreno si Bise Alcalde Bani Senar. An LGU nagtagama nin fondo na matatao nin dugang na biyaya na P5,000 na ‘‘one time benefit’’ sa Octogenarians para sa mga nag-eedad nin 81-84 asin 86-89, asin Nonagenarians na dapat magrecibe nin biyaya para sa mga nag-eedad na 91-94 asin 96-99.

Laen pa kaini, magpapamudmod pa nin P50,000 an lokal na gobierno komo counterpart sa saindang mga Centenarian (100 years old) mantang makakarecibe pa nin P10,00 ‘‘one time benefit’’ kun magsakat pa sa edad na 101 pataas.

Nagpahayag nin pasasalamat an mga senior citizens mantang naogma sinda huli ta premirong bulan kan taon igua sindang dugang na biyaya.

Alagad an ordinansa nakatalaan darahon sa Sanggunian Panlalawigan kan Camarines Sur nganing saindang aprubaran asin maimplementar.