Senior Citizens piglalangkag na an Universal Social Pension

Ni Sonny Malate

Haloy nang pighahalat kan mga senior citizens sa bilog na nacion an pag- aprubar asin  implementar  kan Universal Social Pension Program.

Sa irarom kan programang ini, an mga senior citizens na bakong consideradong indigent marecebi naman kan bulanan na Sangribong (Php1,000.) Pesos na social pension hale sa gobyerno nacional.

Sa presente, 4.1 milyon pa sana sa kagabsan na 12.2 milyon na mga indigent senior citizens an recipientes kan social pension na pigduduhol kan gobyerno.

Sa banwaan kan Goa, Camarines Sur,  sinabi ninda Bienvenido Din, pamayo kan Office of Senior Citizens Affairs (OSCA) asin Angel Bielma, presidente kan Goa Federation of Senior Citizens (GSCF), ini an hurot kan mga kamagurangan na nangangaipong gayo kan incentivo sa saindang huring mga taon sa kinaban.

Nanotaran man ni Din na sa mga meeting kan OSCA sa regional asin provincial chapter kaini, pighihidaw na kan mga miembros an social pension sa tahaw kan presenteng deficil na kamugtakan sa pagbuhay.

Maoorbsebaran na an tema dapit sa universal social pension parating laman kan fake news sa social media na ini aprubado na. Ini an orug sanang nagdadarang kariribongan asin kapungotan sa mga senior citizens.

Sa presente,  an Senate Bill 141 na naghuhurot kan pagduhol nin bulanan na  social pension sa mga senior citizens maigot na pigtutulod ni Senadora Risa Hontiveros. 

Namumundo sinda Din asin Bielma na kadakol mga may kamanungdanan na programa kan gobyerno an dae naiimplementar huli ta an fundo digdi minadalagan sa kurapsyon na nagkuriyat sa gobyerno.

Katakod kaini, parehong nakiulay an duwang oficial sa mga pag-iriba sa Barangay Senior Citizens Affairs (BASCA) na pakarhayon an pagprecomendar sa senior citizens para sa validation kan DSWD Regional Office na magiging recipiente kan social pension.

Pig-admiter  kan duwa na minsan nagkakaigua nin personal na considerasyon asin politica sa proceso kan pagpili kan BASCA  sa pigsusumetir na mga pangaran para sa validation. 

Sa presente, an Goa may kagabsan na 8,140 mga senior citizens. Igua man nin 1,731 na recipientes kan social pension hale sa gobyerno local asin 2,735 hale sa gobyerno national.

Dagdag ni Din, an banwaan kan Goa iyo an primerong LGU na nagduhol nin cash incentive sa senior citizens na 80 hasta 99 años sa designadong cantidad. Para sa sarong centenarian Sincuenta Mil (P50,000) Pesos an pigtatao kan LGU Goa.

Segun  sa GSCF President, an gobyerno local sa paagi ni Alkaldesa Raquel S. Lim nag-alocar nin Ciento Nubenta Mil (P190,000.) Pesos para sa celebrasyon kan National Elderly Month.

Saro man na edificio an hahagadon na mapatugdok  kan OSCA asin GSCF sa paagi kan gobyerno local bilang recreation center kan mga senior citizens digdi.