Seniors: Likay Na Dae Mapa Dapla

“KUMUSTA NA PALAN si Mama mo?” Hapot ni Trining.

“Tano po, anong nangyari ki Mama?” Simbag ni Juliet na sobrina ko.

“Napa dapla baga siya kan sarong aldaw asin natumba sa atubangan kan harong nindo.” Simbag ni Trining.

Iyo ini si ulay-ulay ni Juliet saka si kataid ninda na si Trining. Ngunian lang naaraman ni Juliet na natumba palan si Mama niya pero tolong aldaw na an naka agi. Dae niya ini maaaraman kun dae pa nag hapot si Trining ta mayo man daang sinabi saiya si Mama niya.

“Garo maraot si pag mati ni Mama kasubago.” Dagdag ni Juliet.

Sa madaling istorya, dinara ni Juliet si Mama niya sa doctor asin naaraman ninda pagkatapos kan sinasabing MRI na naapectohan si hutok ni Mama niya.

Dagos ini inoperahan pero huri na gabos asin dae na naagapan.

Arog man kaini si nangyari sa saro kong pinsan na aapudun kong Tina (bako niyang tunay na pangaran). Mga duwang aldaw bago mag bakasyon si Tina sa America na umpog si payo niya mientras nag paparigos siya sa banyo ninda. Dae niya ini pig intindi ta sadit sana daa si bukol niya. Kaya pina dagos niya si bakasyon niya sa America.

Pag abot ni Tina sa America pinabayaan niya ini maski dae pa nawawara si bukol na may kadikit na kulog. Sabi niya ma pa doctor na lang siya pag balik niya sa Manila.

Kan pag biyahe niya papuli sa Pilipinas nadismayo siya pag pasiring niya sa sarong banyo duman sa eropwerto kan Japan. Dinara siya kan ambulansia sa sarong ospital duman pero dae na siya naulian. Konsekwensia daa ini kan si pagka bukol niya. Kaya an nangyari nagpasiring sa Japan si aki niya na hali sa Manila nganing kuanon na lang si hawak ni Mama niya para ilubong sa Manila.

May duwa pa po akong midbid na nahulog asin natumba mientras nag dedekorasion sinda kan krismas tree ninda. Buhay sinda pareho pero nag “physical therapy” po sinda nin mga pirang taon.

An pag padapla o pag tumba pwede po mangyari maski sain pero an kadaklan daang mga nangyayaring arog kaini iyo sa mga harong asin kadaklan sa laog kan mga banyo kan harong.

Dakula po na pag likay an kaipuhan ta espesialmente sa mga may edad na. Oro-aldaw ta ginagamit an banyo kaya likay kita pirmi sa mga basa na salog, sabon sa salog, o madiklom na banyo. Dae bale na kita mag gastos nin dikit sa pag laag nin mga ekstra na mga makakapitan ta sa banyo. Dae bale na kita mag bakal nin mga bakong mahalnas na sapatos o tsinelas. Asin tuyo tang gibohon na mag lakaw nin luway-luway sa mga lugar na ini. Buhay ta an nakataya digdi.

Nagsusurat po ako ngunian manungod igdi sa pag isip na makatabang man lang ako sa mga makabasa kaini.

NAGIROMDUMAN KO PO kan aki pa ako iniba ako kan sakuyang ama na mag lakaw duman sa bukid nin Tankongvaca. Mga pirang beses po ako napahalnas ta basa asin patukad si mga inagihan ming dalan. Kan ika tolo kong pag halnas nag putol nin sarong sanga nin kahoy si ama ko asin sabi niya sakuya gamiton ko daang tungkod nganing ma balanse an pag lakaw ko asin dae ako mapagal tulos. Huna ko nagsusuba lang siya pero naka abot kami sa destinasion mi na mayong pahingalo asin dae na ako napa darinas. Kaya ngunian kun medyo mahalnas o bagong uran o harayo an lalakawon ko, dinadara ko si payong ko na ginigibo kong tungkod.

Saro sa mga nasa memoria ko iyo idtong pig aapod ta na Tarzan kaidto na si Johnny Weissmuller. Nahiling ko sa sarong litrato kaidto na pig kakabit na lang siya kan sarong nars nganing mag “therapy” sa sarong swimming pool. Siya si pinaka marikas na mag langoy sa enterong kinaban kan panahon asin may mga bulawan siyang medalya sa Olimpiks pero napadarinas, napadapla asin nabarian siya nin piad duman sa Caesar’s Palace sa Las Vegas. Mag poon kaito nag para baba na si kondisyon kan salud niya sagkod nagka igwa na siya nin mga iba-ibang komplikasyones na konsekwensya kan si pagka hulog niya.

Siring man kan si nangyari kan satuyang bantog na Bicolanong artista na si Eddie Garcia. Napa dapla siya asin nahulog sa shooting kan sarong aksyon na pelikula niya. Nasa marhay pa kuta siyang kondision maski 90 na edad niya pero nabarian siya sa may liog na nag resulta sa amay niyang pagka gadan.

May mga iba pang tao na nagigiromduman ko na nagka arog kaining mga kaso arog kan si nangyari man sa sakuyang namumutan na Ina. Nabarian man siya nin piad kan natumba siya. Nagparaluya na lang siya pagkatapos kan saiyang “hip surgery” asin nag paaram na samuya. Makusog pa man kuta siya maski 84 na siya kaidto.

An mga bulawan na panahon na ini sa pag retiro kan mga seniors iyo an panahon para mag guno nin mga frutas kan satuyang mga tinanum. Kaya an dikit na pag likay harayo an aabutan. Isipon ta man na may mga bulong o medikasyon kita na pwede mag pa raot kan balanse ta sa pag lakaw kaya likay lang pirmi.

Maski na ngani kun minsan nasa isip ta pa si mga kakusugan ta kan mga hoven pa kita, ining mga bulawan na panahon kan mga seniors iyo and pinaka magayon sa pag rumdom kan mga memoria asin para sa satuyang espiritu.

Likay lang po kita pirmi na dae mapa dapla.