Shine Boy Kaidto, Sorbetero Ngonian

Si Lolo Simo, 68 anyos, makusog pa magpatanog kan kling kling sa sorbetes na parating nahihiling sa kalye Zamora sa sirong kan Supermarket. Zosimo sa tunay na buhay aki ni Enciong na parabuno nin damulag asin vaca asin ni Bosing na propyong mga Naguenio. Sa amay na edad, kaipuhan nang magkayod ni Zosimo ta amay nagadan si Enciong matapos na ini matitanus kan tulang nin damulag na saiyang pig buno asin an saiyang ina na si Bosing mayong hanapbuhay Kundi an mag labada. An saindang harong iyo ang pinaka pobre sa saindang baryo ta ini mayo nin elektrisidad, asin nag tuturog sinda sa harong na tiklad asin kawayan na tagilid dara kan rapado nin mga nakaaging bagyo.

Sa edad na 12 anyos, pig laog ni Zosimo an pag shine nin sapatos na ginigibo sa Plaza Rizal asin sa laog kan Provincial Capitol. Saro siya sa matibay na shine boy ta malinig ang saiyang gibo, ang sapatos garong salming kung mag kintab sa paglimpya bota ni Zosimo. Dakula na an bayad na P.15 an kada pades an siring na sentimos puede nang makabakal nin sarong aniega nin bagas.

Sa pag escuela sa elementarya an aki na iguang quince sentimos saro nang tanda nin kasaganaan ta puede na ining ibakal nin dakul na takad nin linubak asin iskrambol ta gulping mga aki kaidto an mayo maski sarong sentimo sa saiyang bulsa. An mga aki kaidto arog ni Zosimo dai tataong magreklamo sa magurang ta siya nagtatrabaho na sa joven na edad ta an mga aki nagtutubod na obligacion ninda an maghanap nin kwarta tanganing itao sa magurang asin ibakal nin bagas asin panira para sa mga saradit pang tugang.

Kan nagdadakula na si Zosimo, mas lalong nagdadakol na an sensilyo sa saiyang bulsa ta ang pag shine nin sapatos saiyang pinag sasabayan nin pag tinda nin diyaryo kung kaya kampante an saiyang ina asin mga tugang na dai sinda magugutom ta igua nin hanapbuhay si Zosimo asin ini iyo an pag shine nin sapatos asin pagtinda nin diyaryo. Nakalipas an mga taon, nagfamilya si Zosimo asin nagka igua nin 8 na aki, na kaipuhan niyang buhayon asin paescuelahon sagkod magtapos. Dai na siya nakapag tapos nin hais kul kung kaya naglaog siya sa man iba ibang trabaho basta sana magka iguang pagkakan an sadiri niyang familya. Nagi siyang para sorbetes sa sirong kan supermarket sagkod na siya na mismo ang nag gigibo kan sorbetes na masiram. Siya an binibisto ngonian sa Sitio Bagong Sirang napara gibo nin sorbetes asin pinag oorderan para sa mga party. Si Zosimo saro sana sa ejemplo nin mga aki kaidtong inot na panahon na mayo nin cellphone, mayong computer, mayo pa nin Mall ta ang aram kan mga aki, iyo an mag tinda nin diaryo o mag shine tanganing iguang itaong kwarta ki Nanay para ibakal nin bagas asin panira. Harayo sa mga aki ngonian na an balon sa escuelahan pig hahagad pa ki Mama.