Si Aurea Tindera Nin Mantikilya

Dai na nanggad naisihan kun napasain na asin kumusta na idtong mga tindera nin pig titingi na mantikilya sa Supermarket. Natatandaan ko, magpoon na itugdok an Supermarket kan mga ultimong parte kan decada 60 pasaro-saro nang nag utwal an mga para tienda nin tinatakad na mantikilya sa sirong kan Supermarket. An mantikilya iyo an pinaka popular na palaman sa tinapay na pan-amerikano asin sa mainit na pan de sal kan Atlantic. Lalo na minasiram an pan legazpi kan Quality Bakery kun ini pig hahapulas nin mantikilya. Sa Christmas Party sa samuyang escuelahan na Santa Cruz Elementary School, haros gabos na mga escuela may darang balon na Cheng’s Bread na an palaman mantikilya asin iguang partner na Royal Tru O Range, dai pa uso kaidto an hamburger asin French fries. Grabe sa siram an mantikilya iyan an kurahaw kan mga bikolano na mahilig maki dula sa mga pasyonan asin fiestahan.

An margarine sarong klase nin palaman na nadiskubre sa France. Base sa istorya kan Wikipedia, an mantikilya pig diskubre sa tugon ni Napoleon III ta gusto niyang pakakanon nin mantikilya na mga trabahador asin mga soldados na nakikipag laban durante kan Franco-Prussian War. An Mantikilya hale sa gatas kan Vaca na inot nagluwas kan taon 1869. Ninhuli ta paborito kan mga Naguenio an mantikilya, nauso an pag baligya kaini nin tingi o retail, asin duman nagluwas an personalidad ni Aurea, an paratindang mantikilya sa Zamora. Si Aurea gikan sa lahi nin mga pobreng kastila na namundag duman sa Samar. Antes kan giera mundial numero dos, an familya ni Aurea na compuesto nin limang magagayon na daraga asin duwang soltero nakaisip na mag dayo sa Ciudad nin Naga tanganing madulagan an pagtios duman sa Samar. Si Aurea na kalalawgon ni Gloria Romero, iyo an pinakamagayon na babae sa sirong kan Supermarket asin iyo an parating pig dudulok para bakalan nin tinatakad na mantikilya. Kadakol an nag elosyon ki Aurea, igua nin paraguyod nin karita tanganing darahon sa itaas kan Supermarket an mga niyog, gulayon, kamote asin mga karne nin orig. Iguang nag elosyon na mga negosyange sa mercado, iguang mga Panadero, alagad an masuerte na napangagom ni Aurea iyo si Badong taga Pacol, paratienda nin Ice Drop na pig gigibo sa gilid kan Naga River. An mga tindero asin tindera sa Supermarket, pati na an mga kargador asin mga parasaod, naging laman kan saindang nguso an pangaran ni Aurea ta siya kaya tunay na magayon na garong artista. Sa paglakaw lakaw ko sa Zamora, mayo na akong nahihiling na paratakad nin mantikilya, kawasa kadakol na nin ibang palaman na nababakal nin lagdo sa S&R asin sa Landers. Maski siring, dai ta pa nanggad ipapadaog an siram kan mantikilya na itinukdo pa satuya kan satuyang mga ninuno, alagad an hapot, haen na, asin kumusta na si Aurea, an babaing paratienda nin tinatakad na mantikilya.