Si Awel Bikolano Nag Istar Sa Pasay

Dai pa uso kaidto ang LRT asin MRT sa Manila, mayo pa nin gulping trafiko sa mga mahiwas na tinampo asin nahihiling an maririkas na yellow taxi asin mga jeepneys na an kurahaw Quiapo asin Avenida. Si Awel na namundag sa mga magurang na sida Tyong Inggo asin si Tyang Tutay na sarong mestisang kastila alagad pobre asin nabubuhay sana sa pag rigatoni nin masiram na dinuguan asin goto na igung sogok. Si Tyong Inggo sarong matadero kaya siya an nag tatao nin dugo asin bituka kan orig tanganing gibohon na dinuguan asin itienda sa mga kataraid na harong. Si Awel nagsoltero na an mga kairibahan sa baryo iyo an mga kalalakihan na an trabaho iyo ay pag oma, pag buno nin orig asin an mag karpentero. Sarong aldao nagpa aram si Awel sa mga magurang asin mga amigo ta siya mabiyahe lunad nin Mayon Limited kan PNR pasiring sa Pio del Pilar Station tanganing duman sa Manila maghanap nin trabaho. Antes kan saiyang paglarga, nagka igua muna nin karakanan nin ginatan asin balisuso como dispidida party ta an tawo na minalarga pasiring sa Manila mayong pinag iba sa sarong Artista na pinag aaraan ta makaka abot na siya sa Manila asin mahihiling an Quaipo, Luneta asin Avenida ta an mga ini nahihiling sana kan mga bikolano sa telon kan sinehan ta uso kaidto an black and white ni Fernando, Jess Lapid, Jun Aristorenas, Pablo Vertuso asin ni Divina Valencia. Sa Manila, nag istar si Awel sa pinsan na si Facundo sa Libertad sakop kan Ciudad nin Pasay, si Facundo, sarong ahente nin mga Plaka kan Vicor asin Alpha Records. Iyo man idto an naging trabaho ni Awel kaya magayon siyang hilingon sa pinapadarang retrato sa mga magurang ta siya naka sulot nin trubinais asin makintab an sapatos. An mga surat ni Awel nagtataong kaogmahan ki Tyo Inggo asin Tya Tutay ta pirme nakaka halubilo ni Awel an mga Artista sagkod mga parakanta. An mga joven sa saindang baryo mayo nang ibang inisip Kundi an maglarga pasirng sa “Manila Namin” tanganing sa saindang pagbalik sa bikol tagalog na ang pig tataram kan saindang nguso. Kadakol an gustong makalunad sa Mayon Limited ta maogmahon maka abot sa Manila ta an gabos na tawo duman anas mayaman, magayon magduman sa Avenidad ta duman pirmeng pig gigibo ang shooting kan pelikula arog kan ralapagan ta iguang snatcher asin mga holdapers. Magayon magpa retrato sa Luneta lalo na sa rebulto ni Jose Rizal asin sa dakulaon na mapa kan Pilipinas na iguang nag oorolantong tubig sa fountain. Maluya na sinda Tyong Inggo asin si Tyang Tutay, asin an parating pogol iyo an retrato ni Awel sa Manila Zoo asin sa tongod kan Tutuban harani sa Divisoria. Gulpi pang taon an nakaagi mayo na sindang bareta tungkol ki Awel, apuera sa sarong istorya nin kataid sa harong na minsan nahiling ninda si Awel sa sarong harong nin kabisto sa Tramo, si Awel maniwang, iguang kamatean, tanda nin pagtios sa buhay, asin ini dai nagka igua nin familya na maatender Saiya. Nagpaaram sa kinaban an mag agom na Inggo asin Tutay dara nin kagurangan, alagad dai na ninda namansayan an padangat na aki na si Awel. An dating harong na tiklad ni Tyong Inggo na may mahiwas na natad na may poon nin lukban, bayawas, niyog, batag asin santol, asin mapresko ang kapalibotan, ngaonian ini kadootan asin mayo nang nag iistar. Sa bareta kan mga kabisto naka abot sa ,tramo, si Awel daa nagpa aram naman sa kinaban dara kan helang na tesis na an ultimong sinabi iyo na napupungaw siya sa Kabikolan. Iyo iyan si Awel Sarong Bikolano Nag Istar Sa Pasa+y.