Si Bugoy, Para Dakop Kasag

Maogma man nanggad mag taga pasyar sa kostal asin maka atubang ang mga parasisira. Saro na digdi si Bugoy, paradakop nin kasag. Ang kasag iyo ang saiyang buhay ta poon pa sa saiyang mga ninuno na tubong Barangay Castillo, Cabusao, ang pagdakop nin kasag iyo na ikinabuhay kan saindang familya. Digdi naipadara ni Bugoy an saiyang mga aki sa escuelahan asin makapag tapos nin kolehiyo sa Naga City. Nahiling ko si Bugoy kan ang samuyang familya mag attender kan nagtalikod na bulan sa birthday party ni Engineer Wally dela Cruz na ginibo sa magayon asin mahiwas na Resort duman sa Castillo Cabusao. Ang resort maski ngani harani sa dagat igua ining dakulaon na swimming pool na mafresko ang tubig, igua nin magagayon na cotteges asin igua pa nin mini hotel. Ang resort pagrugaring nin sarong dating pobreng daraga na taga New Poblacion asin masuerteng napangagom nin sarong retiradong US Navy. Duman ko naisihan na ang Barangay Castillo, sarong dakulang barangay kan 2nd district, kung kaya kadakol ini nin botante na mas dakul pa sa botante kan Concepcion Pequenia. Ang Castillo Cabusao sarong importanteng lugar para sa mga pulitiko sa pagka gobernador asin congressman. Saro sa magayon na tanawon sa Castillo iyo ang saiyang pantalan ta diyan nagdudoong ang mga parasisira na ang dakop mga masisiram na sira arog kan abo, pompano, pakan, lapez, tabangongo, pusit, pating, pagi, lapu-lapu , yaon pa an mga darakulang pasayan asin matataba na kasag. Maski ngani masisiram na lutong karneng vaca, pork , chicken ang puesto sa birthday ni Engineer Wally dela Cruz, alagad pinag aaragawan iyo ang Cabusao style na luto kan pig gisa na pusit. An pagkaluto kaini iyo ang pig balnawan muna nin bagong magkala kaga na tubig tatanganing mahale ang langsa asin maluto nin kadikit. Matapos mapa titian ang pusit ini gigisahon na sa bawang, sibulyas, kamati asinlaya na iguang pamienta, asin dai paglutoon nin haloy kaya malomoy ang laman asin tunay na masiramon palibahasa freskong pusit hali sa dagat ang pig luto. Sa tahaw kan kasiraman sa pagkakan nin pusit, sa karantahan asin baraylihan, pig apod ang pangaran ni Bugoy, ta ini mabayle sa kantang cha-cha. Antes magbayle, nagtaram si Buboy manonongod sa saiyang maogmang buhay na poon pa kan siya aki pa, paradakop na siya nin kasag na kadaklan pig tetienda sa Naga. Kung tano naging matibay na parabayle si Bugoy ta ang inot niyang style kahawig kan pagkamang kan sarong kasag, alagad sa tahaw kan tugtog nag indayog na ang malomoyon niyang lawas sa bayle na chacha. An mga tawo nag ooropakan sa kaogmahan, patunay sana na maski sinda yaon sa kostal, tatao sindang magogma sa paagi sana kan mga paradakop nin kasag.