Si Coro’ An Playboy Sa Baryo

Mga sampolong taon pagkalihis kan WW2, an samuyang baryo na dating pig kampohan kan mga soldados hapones naging maogmahon na Baryo ta nag burutwaan an mga harong sa mga tubigan na lugar na ang sirong kan mga harong kadakol nin sira na yaon sa ibabaw kan tubig an magagayon na Lotus asin Water Lily. Magayonon pag hilingon an mga sira na sa saindang pag gibsaw, nakakahugpa sinda sa pabilog na dahon nin Lotus. Iguang bagong pig tutugdok na harong na gibo sa kahoy na tabla asin tiklad, mga taga San Gabriel sinda na gustong mag istar sa Siyudad ta si Coro’ sarong parabuno na an trabaho iyo an bunuan sa may gilid kan Naga River, mayo pa kaidto nin Supermarket. Maskulado asin guapito sa saiyang bado na polo si Coro’ na an agom iyo si Bensya na an mga aki iyo sinda Melinda, Junior, Maricel asin an ngohod iyo si Vito. Maogma ang familya ta an magturugang madaling nakihalubilo sa mga aki sa Baryo, asin maboot sindang kataid na harong ta marhay sindang magluto nin gulay ta iyo daa an usong pagkakan sa saindang lugar duman sa San Gabriel. Nagdarakula an mga aki na nag aradal sa mga escuelahan sa Naga asin si Bensya, iyo man an kaulay ulay kan pareho niya mga misis na an pig iirestoryahan iyo an mga pigluluto na pagkakan asin an mga dapat na pang handa sa panahon nin Penafrancia. Nag abot an aldao si Coro’ dai na nahihiling sa saindang harong asin an magturugang nagkakarawat na an saindang istorya iyo na an saindang Ama igua na ibang agom asin nag iistar sinda sa Mabolo. Dai man nanggad napasala an mga istorya nin mga misis na an begote ni Coro’ iyo an agimat sa pagiging Playboy. Nakalihis an mga taon, nagdarakula an magturugang, nagkanya kanyang familya, mayo nang nawalat sa sa saindang harong kaya ini nagaba na sanang mayo nin tawo. Minsan sarong aldao, sarong gurang asin payat na babae an nag abot sa mga pagtaraid, nakikikumusta sa mga dating kabisto, siya palan si Bensya, na sigun sa saiyang istorya mayo na siyang kaibahan sa buhay ta linayasan siya ni Coro’ ta nakakua nin sambay. Pinabayaan an mga aki ta mas pig atenderan an bago niyang babae sa buhay. Sa istorya ni Bensya, nakikidagos siya sa sarong sadiring tawo duman sa San Gabriel, an saiyang mga aki, bihira nang magpadar nin surat sa koreo kaya mayo na siyang madudumanan. An solamenteng nabaretaan iyo an ngohod na si Vito na nag iistar sa dai sinabing baryo sa Baao. Sa paghumali ni Bensya, tinatanaw siya kan mga dating kataraid, na mayong ibang sinasabi na an sarong maboot na ina asin agom arog ni Bensya ngonian nag sosolo solo asin nalilipungaw sa dating maogma nindang familya. Iyo iyan an nangyari sa family na an Padre de familya arog ni Coro’ pinanindugan asin pinagmalaki an pagigi niyan Playboy Sa Baryo.