Si Efren Cantor Taga Bolaobalite

An istorya kan buhay ni Efren Penaflor Cantor, Sr. ordinaryong istorya nin sarong aki sa bukid, na nangitorogan na mag escuela tanganing iguang manuran asin maging marhay an buhay asin makatabang sa sadiring mga magurang pati na sa mga kahimanwa.

Si Efren, ipinangaki kan Enero 23, 1951 sa mga magurang na sinda Job Alcatraz Cantor na tubong Canayonan, sarong paraoma asin para badang sa Tinambac, asin Enemesia Asido Penaflor Cantor na tubong Hiwacloy, Goa, Camarines Sur. Si Efren, solo na aki ninda Job asin Enemesia, nagdakula sa kataid na baryo na iyo an Bolaobalite. Siya nag tapos nin Elementarya sa Poblacion kan Tinambac na mayo pa kaidto nin marhay na tinampo Kundi sarong madoot na dalan na saiyang binabaklay sa laog nin anom na taon na pag escuela sa elementarya.

Nagtapos si Efren nin haiskul sa Partido High School duman sa Goa. Sa amay na oras nin kada aldao nin Lunes, madiklom pa an aldao pig lalakaw na ni efren an malaboy na dalan hale sa Bolaobalite pasiring sa Tierra Nevada tanganing duman mag abang kan pag agi nin Alatco na pasiring sa banwaan nin Goa. Kan makapag tapos na siya nin hais kul, ginastusan siya kan saiyang mga magurang tanganing mag escuela sa Naga City kaya nakapag tapos siya nin General Radio Communications Operator (GRCO) sa Valiente Technical Institute na yaon sa may Hepatura kan Policia sa kalye Arana sa kanto kan Barlin. Nagtapos siyang Valedictorian sa linya nin Radio Operator kung kaya madali siyang nakua kan RMN Station DZHN sagkod na siya ang naging Chief Technician, kasabay pa nin pag tukdo sa Valiente Technical Institute.

Napangagom ni Efren si Erlinda Francisco Velasco Cantor na an familya gikan sa Pasacao asin sinda nag irok sa Barangay Santa Cruz. An saindang mga aki iyo sinda Fernie Cantor Vales nag iistar sa Antipolo Rizal, Efren John Cantor sarong Seaman, Christopher Cantor nagtatrabaho sa sarong Insurance Company sa Manila asin Efren Cantor, Jr. An gabos nindang aki iguang marhay na buhay ta anas sinda nakapag tapos nin College.

Kan mga taon 70, bistadong marhay sa Camarines Sur ang pangaran na Efren Cantor ta bilang sarong radio technician, an saiyang pangaran kasabay na pig sasambit kan saiyang kapartner na announcer arog ninda Eddie Alanis, Fiorel Salvo asin Celso Baguio. Kung kaya duwang beses si Efren na pinag imbitran na magtaram sa mga Graduation nin escuelahan sa Bolaobalite ta saro siya sa pinag bibistong may marhay na prinsipyo sa buhay na iyo ang mag tapos sa pag aadal ta an edukasyon importante sa pag asenso nin sarong tawo asin sa pag asenso nin sarong kumunidad. Sa samuyang pag pasyar sa Barangay Bolaobalite, duman mi nahiling na ini tunay na ladawan nin baryo sa bukid, kolor berde an kapalibutan ta magagayon an poon nin kahoy, gulping poon nin niyog, asin mahiwas na paroyan. An Bolaobalite gikan sa tataramon na kolor bulawan na balite na kadakol kaidto sa lugar. An dalan pasiring sa Bolaobalite iyo na mina agi sa Mananao, iguang magayon na tinampo sa parting too kun ang direksyon hale sa Naga pasiring sa Tinambac. Sa inotan kan Bolaobalite aagihan an dakulang sityo kan Kawayan, sunod an Canayonan asin Kawaynan. Iyo na ini an dalan na maagi sa Yabo sagkod maglagbas na sa Barangay Carolina kan Ciudad nin Naga. An Barangay Bolaobalite nag cecelebrar nin fiesta para ki San Rafael tuyong Octobre 24 asin 25.