top of page

Si Eva, Si Adan Sa Plaza Rizal



Marhay man palan an mag taga tukaw tukaw sa satuyang Plaza Rizal, bakong pirme na sanang naka olmong sa mga kapehan sa SM City. Sa pagkahapon, interong crowded an Plaza Rizal nin mga magkasing irog na kadaklan mga naka uniporme na pang escuela, alagad mga disente sindang paghilingon ta mayo nin kalaswaan na ginigibo solamente an mag istambay, magpahingalo, asin magkarakan nin manlaen laen na isnakan arog kan bolastog, isaw, barbecue, dugo, siomay, kikiam, bopis,maloto, hotdog, asin lumpia shanghai. Igua nin mga inomon na pampapresko arog kan palamig, gulaman, buko, softdrinks asin ice cream. Igua naman nin sadiring quarter an mga V.I o visually impaired kaya mayo na sinda duman sa Gazebo tanganing maghapulas kan mga takyag asin abaga kan mga customer. Naglilibot an mga manicurista asin nag aalok nin serbisyo tanganing banlagan asin sapsapan an mga pangkamros ni misis. Maogmang pag alokon nin manicure ta kadaklan sa mga manicurist, maski ngani sinda mga matured na, pero nababanaagan pa sainda an kagayonan asin marhay na kaulay ulay mantang sige ang kuskos sa sampolong kuko. Harayoon na kum ikukumpara kan mga inot na pamahon. Kan taon 1956 limang bulan pa sana ako kan pirme akong pig dadara kan sakuyang Ina, kaiba an mga madehon asin mga omboy nagtuturukaw sa doot kan Plaza Rizal. Medyo makaherak man an satuyang mga Mama ta minapuli na gutom ta dai pa uso kaidto an mga panienda nin bolastog asin kikiam kaya an mga Naguenio, antes na minapasyar sa plaza, mabungkal muna nin bahaw na maloto sa kaldero tanganing mag mirindal asin dai na magkakan sa New China. Si Eva asin Si Adan, buelo magtukaw tukaw sa Plaza Rizal mantang sige an sapa nin barbecue, maogma sindang magka holding hands asin kung minsan nag aadal kan saindang leksyon. An mga Adan asin Eva sa plaza ngonian, desenteng paghilingon ta mayo sindang pinag iba sa mga tawo na nag iistambay sa mga mall asin darakulang Restaurant. Mayo na an mga gurang sa Naga na mahilig kaidto mag debate sa relihiyon, maging an mga gurang na mahilig sa kawat na Dama, mayo na sa dating lugar. Paborable man sa mga nagtitipid na mga estudyante na kadikit an allowance, an mga tinurugutan na magkaag nin food stand sa sidewalk kan Plaza na nag ooperar kun hapon asin pamanggihan, ta igua sanang dakulang payong,puede ka nang magplamanggi sa baratong presyo. Ang Plaza ngonian na lugar kan satuyang mga kaakian, magayon nang paghilingon ta ini paborito nang pasyaran kan mga Naguenio. Gibohon tang tunay na pahingaluan an Plaza Rizal basta mantineron an kalinigan, arog kan pag hale kan mga natatadang laboy sa mga gilid kaini tanganing dai nin alikabok. Sigurohon nanggad kan City Health Office an kalainigan kan pagkakan asin mga utensils tanganing malikayan an kahilangan. Maabot an aldao an Plaza Rizal iyo na an istambayan kan mga taga media na miembros kan Kantong Putikon.

Comments


bottom of page