Si Goyo, si Pogi saka si Ricky

Pakalihis poco mas o menos 7ng taon, si Prof Greg Castilla PhD, aka “Goyo” na magprobar na magpuli sa Naga tanganing bisitahon an saiyang mga kaklase, amigos Y amigas asin co-teachers alagad na unsyami, napornada huli ta siya saka an saiyang agom na si Lynn suspetsadong tinaramaan nin Covid kan sinda magdalaw sa Cavite antes magpuli sa Bikol.

Preparado na kuta na an gabos maguin sa original na venue kan tiripon, sa saindang harong sa RJ Village sa Canaman, sa Bob Marlin Resto sa Naga asin sa Casa Soriano kan pamilya ni Boy Claro.

Kadaklan kan batch high school 66rs sa Ateneo kun bakong nasa abroad, permanenting abroaders na o may mga mati-mati na kaya dae piglalaoman an ciento por cientong attendance.

An piglalaoman na lang na maarabot iyo si Boy Claro siyempre, an contact person ni Goyo digdi sa Naga, si Obon Dumalasa kan Calabanga, si Jun Quijano kan Milaor, si Vic Sumalabe kan Buhi, Jimmy Malazarte kan Iriga, Boy Fajardo kan Tabuco, Engr. Endong Tordilla kan Calabanga asin ako siyempre alyas Bido kan Milaor City.

Alagad nagka-birigla kami ta pag-abot mi sa Casa Soriano mayo an mag-agom na Castilla ta nakaralaom sa harong ninda sa Canaman asin mayo man si Dumalasa ta siya asin an saiyang esposa na si Bella parehong trangkasado, naka-confined sa NICC.

Sa mga 66rs ordinaryo an tiritiripon pakatapos na kami mag-gradwar sa high school, mag-aragom asin mag-trabaho sa abroad si iba.

Kaya lang pakatapos kan ika-50ng anibersaryo kan high school graduation dakul nang nagtaralikod sa kinaban arog ki Noel Calleja, Efren Salceda, Bedon Nabua, Moises Badong kan Baao, Rudy Castillan, August Victoria (golden awardee), Raul Villar asin Manny Disuanco, saro sa duwang coordinators kan Golden Anniversary kan 2016.

An magayon kan samong pag-iriba ta palibhasa sobra nang 7ng dekada an buhay sa ibabaw kan kinaban inaako na an pagtaralikod kan iba pero padagos an pagpangadie para sa kamurawayan kan saindang mga kalag.

Si Goyo saro sa mga espesyal na myembro kan batch 66 ta apuera kan siya an editor-in-chief kan Blue and Gold high school publication asin an Maogmang Lugar literary magazine sa laog nin 2ng magkasunod na taon (65-66), siya pa an saro sa mga original na columnists kan Bikol Mail Regional Newspapers poon kan 2002 sagkod ngonyan (kasarabay niya si depuntong Konsehal Chito Perez MD, si Vic Samson kan Illinois USA, asin si Al Villamora, retired US Navy Luetinant.

Si Goyo bako lang paborito kan mga Atenista kundi pati kan mga kolehiyala, bako lang siya professor duman sa Washington State University asin Seattle University kundi siya parasurat na pigbabasa sa America asin sa Australia, matibay mag-English, matibay mag-Tagalog, matibay pang-mag-Bikol. Pirming naka-smile. Mayong masamang tinapay sa laog kan saiyang hawak. Ergo, amigo kan gabos.

Nag-eskwela siya sa pagka-padi sa San Jose Seminary, an eskwelahan kan mga Pilipinong gustong maguin Heswita kundi nabisto niya an saiyang futurong esposa na si Lynn kaya nalingawan niya an pagsulot sutana, naguin bankero pa siya sa Naga kaya lang an pamilya nag-decider magpa-America, magtrabaho duman asin mag-adal sagkod masteral asin doctoral degrees.

Author pa siya nin dakul na libro na anas best sellers sa America asin digdi sa Pilipinas.

Siya aktibista asin parasurat na segun saiya a “writer with a social conscience”. Namundag sa Sipocot, asin nag-eskwela duman sa elementarya pero nagtapos sa Naga Parochial School. An mga magurang niya poro paratukdo. Si Goyo iyo man an nagpundar kan O’ Bikoliana library sa Ateneo de Naga University, sarayan kan gabos na babasahon sa tataramon na Bikol asin guibo kan mga Bikolano.

Si Dr. Castilla bistadong aki (paborito) ni Fr. O’B arog ki depuntong Sandy LLaga, Jimmy Veneracion, Ben Usigan asin Ben Rueda.

Mamundo kami ta dae mi nakahampang si Goyo, mamundo ta dae niya nabisita si publisher Nilo P. Aureus, asin mamundo an Bikolandia ta dae siya nabisita kan sarong Bikolanong superstar.

Kumusta na lang sa saiyang mga aki na si Mutya asin si Laya asin sa saiyang nagdadakul na makuapo.

An pinaka-importante ta salbado na sinda sa helang na Covid kaya naka-puruli na sa saindang tolong estada sa Seattle, sa Las Vegas asin Texas.

Keep it up Goyo and Lynn.

We are very proud of you!

*

Nag-text palan sako si dating Congressman Leopoldo “Pol” San Buenaventura (CPA/lawyer) na dae ko lingawan na masambit asin omawon man lamang si Ricky Tomotorgo, saro man na Atenista asin abogado na sikat ngunyan na vlogger/blogger sa social media sa enterong Pilipinas. Dakul pati an nag-aarapod sako hale sa Kabisayaan asin Mindanao kun si Ricky bistado ko. Sabi ko man bako lang na bisto kundi barkada yan asin kaedad kan sakuyang tugang na nguhod na si Bong.

Pakaraya lang Ricky ta marhay an dalagan kan saimong mga kaisipan, tuyaw asin komentaryo.

Salamat Pading Pol S. B.

*

Paaram man ki Don Juan Brusas Villaranda, Ateneo High School ‘69 na nagtalikod sa kinaban asin inilubong ultimong aldaw kan 2023. Siya pigbabansagan sa Ateneo na Pogi asin Papay sa saindang barangay sa San Antonio, Milaor. Undefeated siya bilang barangay kagawad sagkod sa pinaka-ultimong turno.

Saro sa dahilan kan saiyang pagtalikod iyo an pag-inom na dae nagsusumsom, 73 na siya kan siya magadan. Nalibot niya an pinaka-harayong sityo kan barangay ta siya an naglilibot kan mga padarang surat por medyo nin koreo.

Sabi ni Tito Valiente, famusong movie critic ta kun minasakat sa stage si Pogi maski dae magtaram minabagsak an entablado.