Si Juan Nag Exam Sa Navy

Kitang mga Naguenio iguang mga kanya kanyang istorya manonongod sa satuyang mga tugang o amigo na matriunfo na nakalaog sa US Naval Forces o US Navy na kaidto yaon sa Sangley Point, Cavite asin naitransfer sa Subic Bay, duman sa Olongapo City. An amigo kong si Berting member kan Ateneo Batch 63 asin ngonian nag eerok sa Houston Texas, iyo ang saro sa nagkakaperang taga Naga na nakapasar sa US Navy sagkod na nakapag retiro asin an intero niyang familya naipetisyon pasiring sa amerika. Si Manoy Noel na tubong tinambac, dai ngani nag aaram kung tano ta pig dara siya ni Papa niya na sarong maestro asin coach sa Softball pasiring sa centro kan Naga tanganing magparetrato ta iyo palan idto an kaipuhan tanganing mag apply sa US Navy. Si Manoy Noel nakapag retiro sa Navy matapos na madara niya sa amerika ang saiyang mga magurang asin mga tugang. Kadakol mga maogmang istorya ang mga bikolano na nakapag laog sa US Navy. Pero an saro sa iginalang na bikolano ta kan siya makalaog sa US Navy, masuerte siyang nagpara adal asin nakapasar sa haros gabos na eksaminasyon sa Navy kaya siya naging halangkaw na opisyal kan US Navy asin nabot niya ang puesto nin sarong Commodore. Iyo iyan si Juan, sarong ordinaryong estudyante kan Camhi na tanganing makapag escuela nin free tuition naglaog siyang trombonista sa school band kan Camhi na an maestro iyo si Mr. Abanio. An pag apply sa US Navy dara kan espuerso kan saiyang tugang na matua ta dai siya tatao kung papano mag apply sa US Navy duman sa Subic. An dai malingawan na istorya ni Juan iyo ang pag biyahe niya hali sa tinambac pasiring sa Olongapo City ta iyo idto ang premiro niyang pagluwas sa Bicol, kun kaya dara niya an sarong papel na pig surat kan sayang mga tugang kun sain maduman asin sain malunad tanganing maka abot sa Olongapo. Paghale sa PNR Tutuban pighanap niya ang Victory Liner sa Quezon City tanganing magbiyahe pasiring sa Olongapo City. Mayo siyang madadagusan duman ta mayo sindang kabisto solamente ang dara ni Juan iyo ang “ba’yong” na may laog nin bagas, bading abo, pasayan , asin buhay na an-it na pinagbalon saiya kan magurang. Arog kan gibo nin ibang dayuhan, nag istambay siya sa police station. Sarong seksing GRO ang inaresto kan sarong pulis asin pig blotter sa pulis. Kan an babae paluwason na sa presento ini saiyang pig kaulay para makahanap siya nin matuturugan ta sa pagka aga ma take siyang exam sa Subic asin mapuli sana man siya pagkatapos kan exam. Sabi kan babae, sadit an saiyang kwarto asin igua sanang sarong katre, tanganing daing dakul na orolay, ipinahiling niya ang laog kan ba’yong na yaon nag bagas bading abo, pasayan asin an-it. Tolos naogma ang babae asin nagtugot na magturog siya sa pigdadagusan. Haros mag agang dai napaturog si Juan ta supog siyang marhay asin dai komportable ta magkataid sinda sa katre, kumbinsido siya ki Ate ta maski saro ining GRO dai nanggad pinag interesan an pagka lalaki ni Juan lalo na pati na si Juan sarong guapong soltero. Pero masuerte si Juan ta naka pasar siya sa examination kan US Navy, alagad dai niya pig tuga sa GRO. Sa pagbalik ni Juan sa Subic pagkalihis nin perang simana para sa Physical Examination duman giraray siya nagdagus sa GRO basta igua siyang darang pasayan, bading abo asin iba pa hale sa Tinambac. Nagkasuwayan sinda kan GR0 na an paghuna dai siya nakapasar asin an tugon saiya dai nanggad magpundo sa pagpangarap na maging US Navy. Ngonian na retirado na si Juan bilang Commodore sa US Navy, nagigiromdoman niya ang tabang na idinuhol saiya kan sarong GRO sa Olongapo na nungka niyang nakua ang pangaran ni Ate na gusto niya man kutanang paabotan nin pasasalamat kaya lang ang gabos yaon na sana sa memoria.