Si Manay Yaon Sa Kumbento

Maogma sa pagmati na saimong nasumpungan an sarong maboot na tawo pagkaihis nin 55 taon. An sakuyang nasumpungan sa paagi nin retrato sa Youtube iyo si Manay Saling na ngonian kagalang-galang na namamayo kan Daughters of Mary na iguang kumbento sa likuran kan Basilica Minore digdi sa Naga City. Siya si Mother Superior Rosalina Enciso sarong maboot asin mahigos na Madre asin tubong banwaan nin Cabusao. Kan taon 1970, 14 anyos ako, nagtatrabaho bilang “errand boy” o katabang sa Daughters of Mary Convent na yon diyan sa may gate kan Ateneo de Naga. Nakalaog ako sa Daughters of Mary sa paagi ni Mother Superior Therese na tubong Bulacan. tolo kaming mga estudyante na nagtapos sa NACIYOS na pig manehar kaidto kan Daughters of Mary, an tolong iba iyo sinda Julian Vergara nakaistar ngonian sa Albay District, Legazpi City, Si Juan Preconcillo, naging Engineer sa Palawan, asin ako. Kaming tolo tinugutan na mag istar sa sarong quarter sa likod kan Daughters of Mary, libre an turugan, libre an kakan asin libre an tuition sa CSNHS night classes. Ako an na assign sa Ateneo Canteen na pig mamanehar kan Daughters of Mary. Sinda Julian asin Juan parehong magka ibahan sa Little Flower Nursery na pig mamanehar kaidto kan Daughters of Mary. Maogma an sakuyang buhay sa kumbento ni Mother Therese ta duman kami pig tukdua mag pangadye antes magturog asin sa pagka aga. Sa laog kan kumbento, duman ko masumpungan si Manay Saling na kan panahon na idto sarog magayon asin mahinhin na daraga na gustong maging regular na madre kaya inaapod sindang aspirant asin postulant. Haros aro-aldao kaming magka iribahan kaya binisto ko siyang tugang na matua kaya inaapod ko siyang Manay Saling. Pagkalihis nin perang taon, mayo na ako sa kumbento ta nag escuela na ako nin day classes sa Camhi sagkod na naging miembro ako kan Batch 74 asin dai ko na nanggad nahiling si Manay Saling. Sarong aldao, igua akong nakasakay sa jeepney na biyaheng Masgsaysay na sarong madre kan Daughters of Mary asin saiya ko naisihan na si Mother Rosalina Enciso iyo na palan an saiyang pamayo. Nag alangan akong mag bisita saiya sa kumbento ta baka dai na ako matandaan ninhuli ta 55 taon na an nakalipas. Orgullo kong naging katabang ako sa Daughters of Mary ta na experiencia ko an buhay nin mga maboot na tauhan kan diyos kabale na si Mother Superior Rosalina Enciso.