top of page

Si Nilo Asin An UNC



Haloyon na palan an mga aldao kan inot kong nabisto si Nilo Aureus, an sakuyang maboot na amigo na matuninong na nagpaduman sa kahadean kan kaglalang. Saro akong ordinaryong bike messenger kan dating Clavecilla Radio System sa katangaan kan dekada 70. An parati kong pig bibisekleta iyo an palaog sa University of Nueva Caceres tanganing maghatod nin telegrama ki Mr. Emeterio Soler, o arin man sa mga oficina kan UNC. Bako pang matawo an campus kan UNC tuyong aldao ta an mga escuela kaidto mas pabor magpa enrol sa hapon asin Bangui, kun kaya sa pagpara balik balik ko sa Administration building kan escuelahan, duman ko pirmeng nakaka sabatan si Nilo. Minsan nagkakawat sa isipan ko na si Nilo nagtatrabaho sa pag roneo nin mga papeles o sa halipot na pag taram saro siyang ordinaryong empleado kan UNC. Mayo man kaidto nin pagkakataon na kami mag ulay-ulay asin mag estoryahan, basta kami nagka bistohan sa lalawgon sana o kaya naging familyar kami sa lambang saro asin dai ko ngani aram na Nilo Aureus an saiyang pangaran. Mas inot ko pang nabisto an pangaran ni Danny Aureus ta kami nagka ibahan sa Radio Station DZHN kan 1981 ta kami parehong mga reporters na inaapod Trivol Patrol. An radyo DZHN namumugtak kaidto sa 3rd floor kan Supermarket. Kan panahon ko sa DWRN duman sa Queborac sa lindong ni Station Manager Celso Baguio, iyo idto an punto na nakabisto ko si Nilo na iyo an maysadiri kan famosong Goldprint. Sa Goldprint kaya pinapa imprenta an mga papeles kan DWRN arog kan kalendaryo asin mga certificates. Ang maboot na pakiki iba samuya ni Nilo iyo an naging dalan kaya naging dayupot niya kaming amigo sagkod na magpalipat lipat na ako nin trabaho sa ibang estasyon, si Nilo an madaling dulokon sa mga pangangaipo sa linya nin pag imprenta. Si Nilo an nagbisto kan sakuyang kadikit na kaaraman sa pag surat sa lenguaheng bikol na iyo na ining kolum na “Calle Maduros”. Dakulang pagpa salamat ko ki Nilo an pagigi kong regular na miembro kan mga parasurat sa pinaka sikat na local na peryodiko sa kabikolan, ini an Bicol Mail. Gulping mga aldao an nakaagi asin sa samuyang pag kape sa Kantong Putikon sa SM, saka ko lang naisihan na si Nilo palan napangagom an hale sa familya nin De La Cruz kan Bagong Lipunan sa Arana. An de la Cruz family, samuyang kataid sa likuran kan samuyang harong na haros nagkaka hirilingan kami sa samuyang mga banggirahan ninhuli ta an kalye Bagong Lipunan yaon sana sa balyo kan Santa Cruz Poro. Duman ko pa naisihan na kan panahon na si Nilo nagtatrabaho sa UNC, nag iistar palan siya sa sarong arkilahan na harong ni ngonian Kapitan Matias Largo. Si Nilo an sarong ejemplo nin solterong pobre na tubong Libmanan, nagpasiring sa Naga tanganing mag escuela asin magtrabaho sagkod na inabot niya an estado na tanda nin sarong tawong mahigos, matiyaga asin may marhay na kaugalian. Salamat Na Marhay Saimo Amigong Nilo!

Kommentare


bottom of page