Si Romy, An Tapayas, Asin Si Sening

Kumusta na kaya an sakuyang amigo na si Romy na sakuyang nakaibahan bilang mga “boys” sa Daughters of Mary Convent na yaon sa may Ateneo de Naga. Taon 1969 kan magka klase kami ni Romy sa Naga City Youth Opportunity School (Naciyos), sarong out-of school youth vocational center na pig tugdas ni Mayor Vicente P. Sibulo. Kung kukuentadahon, si Romy nag eedad na ngonian nin poco mas o menus 73 anyos. Pagkatapos mi sa Naciyos naglaog kaming sa kumbento ni Mother Therese bilang mga “katabang” o errand boys ta ako kaidto yaon pa sana sa edad na 14 asin si Romy 18 asin ang kumbento iyo an nagbabayad kan samuyang tuition sa High School. Maogma an samuyang buhay sa kumbento ta libre an istaran, masiram an mga pagkakan asin maboboot an mga madre. Kan panahon na idto samuyang na experiencia ang isog kan pinaka makusog na bagyo na si Typhoon Sening ( International Name Joan). Si Sening nagpoon maglaog sa Philippine Area of Forecasting Responsibility Octobre 11 alagad nagtama sa Naga City kan Octobre 15, 1970. Igua siyang kusog na haros mag abot sa 300kph mala ta sobra sa 200 katao an nagka garadan sa bagyong Sening. An saro nakasalbar sa isog ni Sening iyo si Romy ta kung bako sa bitbit niyang sarong sako na bagong marata asin hilaw pang mga tapayas, dai nanggad siya papatawadon ni Sening ta intero siyang papalitong litongon sa tinampo. Aga kan Octobre 15 nagpaisi ki Mother Therese an sarong misis na taga Dayangdang na magpadara daa ang kumbento nin sarong “boy” ta iguang itatao sa mga madre. Pag abot ni Romy sa Dayangdang, ipina porot saiya ang wararak na mga bunga nin tapayas na pinatumba ni Sening, haros pano an sarong sako nin magabat na tapayas. Mayong malunadan kan panahon na idto ta an mata ni Sening nagpoon nang maghale sa Naga City asin nagpopoon na ang makusogon na doros na iguang halong mapution na uran kaya dai mo mahihiling kan saimong kataid na harong. Sa kada pag lakad ni Romy poon sa may Colgante abot sa Kumbento haros magkatal an saiyang mga bitis sa kusog kan doros ni Sening. Naka abot si Romy sa Kumbento na haros pa sana wararakay ang bado ta pinarakit na ni Sening. Dai nanggad naisip kan Misis na taga Dayangdang na dai dapat pig sugo si Romy para sana magponpon nin mga narata na tapayas mantang nagpapahingalo sana man si Sening ta ang saiyang mata uminagi sa Catanduanes asin sa Naga. An paghuna kaidto kan mga tawo tapos na an bagyo ta ang tuninong asin nag init, iyo palan idto an mata kan bagyo. Si Romy naka pag adal nin Engineering sagkod nagi siyang Engineer sa DPWH sa Palawan. Naging magayon ang buhay ni Romy kaibahan an saiyang familya sa Palawan asin dai na nanggad nagpuli sa Bicol. Mayo na kaming pagka aram kung kumusta na si Romy an samuyang kaibahan sa kumbento na namatean ang kusog kan bagyong Sening.