Si Taning asin si Lugi

Sa Camarines Sur an hapot ki isay ka? Sabi kan sarong senior citizine na botante, pensionado, sa demonyo ako. Segun man sa sarong juven maski ano pang mangyari ki Lugi ako ta may kuarta.

Nagrarani an Mayo 9 nagrorobo-robo na.

Sa primer distrito, an pinaka-sadit na political district sa provincia barantayan an mga lideres kan ambos lados. Palibhasa an mga banwaan kan Del Gallego, Ragay, Sipocot, Lupi asin Cabusao haros nasa laog kan bulsa kan mga Andaya kaya an pagtubod kan mga nagmamasid magpoon sa congresista abot gobernador na magturugang, tapos na an eleksyon. Gana an mga Andaya pero dai man mapa-supil an mga Villafuerte.

Sa ikaduwang distrito na kinamumugtakan kan diosis kan Libmanan asin compuesto kan mga banwaan kan Gainza, Milaor, Minalabac, San Fernando, Pamplona, Pasacao asin Libmanan kontrobersyal an politika digdi ta an nakatukaw na deputado iyo an kontrobersyal na si LRay Villafuerte, an hadi kan poderoso, ma-impluwensiya asin makuartang Villafuerte Dynasty. Pero maribok na marhay an politika huli sa mga posts sa social media kan kampo ni Villafuerte laban sa saindang ka kontraryo. Nagbabarabaan o nagpaparasingan pa nin mga political posters asin panu-pano nin e-pal na paskil bako lang sa gilid kan highway, sa mga lanob asin kudal, sa mga edeficio, sa mga tarpaulin na nakabitin, sa tahaw kan tinampo kundi an pagmasid kan mga tao kan dalagan kan politika daing guirirong-guirong an mga lideres ta garo uromok-omok.

An pagrara-utan kan ambos lados dai matawaran.

Sabi man kan lado ni Andaya an mga daga asin iba pang propiedades na illegal na sinarakop asin inanab kan pamilya kan nakatukaw sa kapitolyo saindang babarawion asin ibibwelta sa legal asin orihinal na propitaryo kun sinda an manggarana sa eleksyon sa Mayo 9.

Maski dai nagkandidato si ex-Congressman Dato Arroyo laban ki Congressman LRay pero kaiba ni Andaya paglibot-libot bako lang sa distrito na dati niyang pugol kundi sa apat pang ibang distrito kan Cam Sur.

An pagtubod kan kadaklan kun naglaban si Dato para congressman tiklop si LRay ta padangat si Dato kan saiyang dating distrito lalo kan banwaan na Libmanan.

Garo siertong gana na si LRay ta an kalaban niya bako si Dato kundi an dating security guard kan aki kan dating Presidente kan Pilipinas na si GMA. Kaya palan dai nagdalagan si Dato ta siya an regional campaign manager ni Mayora Sara Duterte para vice -presidente kan Pilipinas.

Aktwalmente, si Nonoy Andaya, si Dato saka si Congressman Arnie Fuentebella kan Partido iyo an iriba-iba magkumbinsir kuta

ki VP Leni Robredo na magkandidato para gobernadora kan Camarines Sur kaya lang nagdagos guiraray para presidente laban ki dating Senador Bongbong Marcos o BBM.

Sa social media an apod kan kampo ni Villafuerte ki Nonoy Andaya, nagkusog nin boot naglaban para governador laban ki Luigi Satanas o Demonyo o Taning.

Iyan pati garo an dahilan kun tano ta nagpalaba nin barabas asin bigote si Nonoy Andaya tanganing ipahiling na siya eksperyansiyado na asin ta an kalaban na si Luigi totoy-totoy pa ( dating cabinet member, DBM secretary, dating chairman kan house appropriations commiteee, halawigon na congressman vs sa 24 anyos na soltero asin champion sa wake boarding sa apitolyo saka sa Laguna).

Sa 3rd district na kinabibilangan kan ciudad nin Naga, kan capital town kan Pili, mga banwaan kan Camaligan, Canaman, Magarao, Bombon, Ocampo asin Calabanga garo hayahay an incumbent Congressman na si Gabby Bordado. Pigsusururugan siya kan mga matitibay kuta na asin dekalibreng politiko arog ki Cho Roco na dating Naga City Mayor asin congressman, Atty. Agapito Tria na dating konsehal kan Naga, dating assistant national director kan NIA asin sarong makata, Si Atty. Joel Cadiz na dating Solicitor General kan Republica asin an makuartahon na dating mediaman na si Sir Noel de Luna (SND). Anas kutang matitibay kaya lang mayong balwarte.

An Partido district na kontrolado kan mga Fuentebella compuesto kan Tigaon, Goa, San Jose, Presentacion, Lagonoy, Garchitorena, Caramoan asin Tinambac. Nagdadaraugan dikit kaya lang katapos-taposi Fuentebella man guiraray an minagana.

An pamilya Fuentebella labi nang 100 na taon sa vida politika kan Bikol.

An pinaka-dakulang distrito iyo an Rinconada na compuesto kan Iriga City, Baao, Bula, Buhi, Bato, Balatan asin Nabua.

Kun siisay an gana sa Rinconada sa pagka-gobernador gana sa provincia. An Rinconada dating pugol kan mga Alfelor alagad kan naka-aguing mga taon an pamilya nag-iriwal-iwal kaya nagbutwa an liderato ni Congressman Sal Fortuno sa laog nin labing sarong dekada. An mga Fortuno kuta mayo nin daugan. Kundi ngonyan na eleksyon an incumbent na si Congresswoman Jocelyn Fortuno nagdesisyon na dai na lugod makandidato pakalihis nin sarong turno maski segurado kutang magana maski siisay an kalaban. Si Congressman Sal na bagong kingpin kan Rinconada nagpahunod ki outgoing Gov. Migz Villafuerte na iyo na lugod an ma congressman sa parteng ini kan provincia.

Kan 2019 midterm election ginana gabos ni Nonoy Andaya an boto sa apat na distrito para gobernador kan Camarines Sur apuera kan ikalimang distrito kaya si Migz guiraray an nakatukaw sa capitolyo.

Nagtutubod an mga Villafuerte na pag-ginana ninda sa Rinconada ngonyan na eleksyon magana guiraray sinda sa enterong provincia.

Git-gitan an eleksyon na ini sa parte kan ambos lados, dikit lang an daraogan kan magka-ibong na kampo pero gulping kuarta an mauubos asin sana mayong dakul na dugo an mabulos.