Si Tato, si Nelson o si John?



Maski magpurustahan pa, maski ngani an tolong kandidato para alkalde kan Naga, nagkukurahaw na ki Leni sinda, an magana sainda seguradong may bendisyon hali ki Nuestra Señora.


Sabi daa kaya nagpatogdok harong si Madama sa Magarao ta makandidato siyang gobernadora kan Cam Sur, bako man palan kundi presidenta kan Republika.


Sabi daa mayo siyang itulak kabigin sa tolong aspirante--- Incumbent Mayor Son Legacion, ex-Mayor John Bongat asin an multi-milyonaryo na si Don Fortunato “Tato” Mendoza.


Sa Naga segurado nang gana si Leni baka 99%. Sa Cam Sur mga 98%, sa Bikol 95%.


Pero pag-abot sa Naga, an dinastiya kan mga Robredo, mayo dyan neutral lalo na si VP Leni. Si Bongat naka mayor huli sa bendisyon kaidtong depuntong si Jessie M. Robredo, an padangat na esposo ni Leni. Para Bise na kaidto si Nelson Legacion, nanggarana sinda 12ng taon na an nakaka-agui.


Si Mayor Legacion maski ngani pig-angat man kuta ni Vice-Mayor Nene De Asis pero testing lang idto kan saiyang lialtad ta kan naka-aguing lokal na eleksyon kan 2019 si Legacion susog sa huringhuding suportado ni gurang na Villafuerte, suportado pa soboot ni Noel De Luna na an nasa likod si Sen Bong Go kuno.


Kan magsumpa si Legacion sa atubangan ni Leni, ni Bongat, ni Nene, ni Cong Gabby asin iba pang haralangkaw na opisyales kan ciudad na siya fiel talagang maka-Robredo asin kaiba kan ubos kun ubos, gabos kun gabos na linyada inako siya na maguin mayor kan pag-iriba.


Si Tato kaidto nagdalagan man guiraray pero maski ngani nadaog alagad si botong nakua niya labing 35mil na dikit sana si deperensya sa ganador na si Legacion.


Si Bongat simpleng nagtalikod asin nagpairarom sa anino nin mayo na nin vida politika.


Kan anibersaryo kan pagka-gadan ni JMR surong taon nabigla si mga taga-Naga kan magtaram via on-line si VP Leni na may mga tao daang nakalingaw na kan marhay na iribanan. Nagpahayag nin hinanakit na maski dai sinambit kun siisay pero an pigtutumbok an incumbent Mayor na si Legacion.


Buhay pa kadto si gurang LRV na nag ngi-ngisi-ngisi pero sa parte ni Mayor Son dai man daa siya naghagad nin suporta hali sa mga Villafuerte pero dai mo man ngaya mababasol kun gusto niya man daa an padalagan kan ciudad nin Naga.


Naguiguiromdoman ko pati sa ultimong birthday ni depuntong David Dollano durante kan kasagsagui kan pandemic kan may sarong taga-mediang maghapot ki Tato kun ano an masasabi niya sa presenting kamurugtakan kan Naga kun siya an nanggana, inako niya prangkamente na magagadan ngaya ako sa tahaw kan Covid 19 pandemic. Grabe daa an problema, sabi ni Tato.


Tolong taon man an nag-agui pero kan karandidatuhan bako lang na duwa an nagsasaplakan para sa posisyon kan mayor kan Naga kundi tolo lugod.


Si Bongat nagtutubod na napaka-ingrato ni Legacion apesar na siyam na taon sindang magkaibanan o tolong turno bilang mayor asin vice-mayor.


Segun baga ki Atty. John ingrato si Legacion o daing utang na boot. Sa parte man ni Legacion dai niya daa puede itao guiraray an pinaka-halangkaw na pwesto kan Naga ta an saiyang ka-tandem iyo an nagpadaog kan kaso kan pamilya Mariano kontra sa ciudad nin Naga sa isyu kan tunay na propitaryo kan kadagaan kan natutugdukan kan City Hall pati kan Naga Civic Center. Napabayaan daa kan administrasyon ni Bongat saka kan abogadong si Joel Cadiz.


Huna ko baga ining si Tato mapahingalo na ta marhay an saiyang negosyo espesyalmente an M. Plaza na nagkukuno-kuno an mga suki asin kadakul na paarkilahan na edificio asin lote sa laog asin sa luwas kan Naga. Asin sabi niya kadto, dai niya kaya an gabat kan problema kan kadara-dakulang ciudad arog kan Naga. Pero nag-arangkada man guiraray. Mala ta pano man sa aire an saiyang pabantulin asin lakop man an saiyang patalastas kan saiyang kandidatura kabali an mga heganteng billboard.


Segun kaya sa mga taga-media na kadaklan nasa kampo ni Mendoza dikit na sana an hahanapon tangarig madakop niya an kapangganahan pakalihis nin duwang pagprobar sa politika.


Saro pa an aragawan daa nin boto kan incumbent na si Legacion asin ni Bongat na sabi kan mga taga City Hall maboto sinda ki John alagad “Alo lang”, sa aragawan kan duwa baka si Mendoza iyo lugod an manggana.


Pig-iisyu pati sainda kun siisay an tunay na taga-Naga. Si Tato namundag daa sa Naga maski Tagalog an mga magurang, si Bongat sa Naga man nagdakula maski an mga magurang taga-Partido kaya lang si Legacion, daa talagang provinciano, Buhi Laker, sabi pa ngani taga-Ombao Polpog, Bula.


An incumbent na si Legacion nagtagal asin napakarhay an dalagan kan gobyerno lokal sa tahaw kan pandemya na kadakul an kaso nin Covid 19 kan naka-aguing labing duwang taon.


Maski si VP


Leni sibot kan saiyang kampanya sa enterong Pilipinas para presidente kan nasyon garo igwa man yan sa irarom kan saiyang boot na pigsusurog o mas padaba sa arin man sa tolo.


Sa ultima hora kun siisay an ihinghing ni Leni iyo an magana sa Naga.