Si Tia Inya, Esperetista

Natatandaan ko an parating pig tataram sa programa sa radyo ni depuntong David Dollano, naging sikat na radio announcer sa Naga na mayo daang Propeta ang pig tutubod sa sadiri niyang lugar. Sa istorya ko, bako man propeta ang pag oorolayan Kundi esperetista na nagbubulong nin mga naiibahan nin tawong lipod asin nagbubulong nin kulibra kan mga aki, asin naghihilot nin mga goromok na tulak kan mga omboy. Si Inya na agom ni Roming, saro sa pinag dadayo na esperetista sa saindang baryo asin kadakol man nanggad ang naoomayan. Minsan may nag bibisita sa saiyang tagilid na harong na tiklad na huna mo kweba ta pa-kamang ang paglaog sa saiyang harong ta dai naipa irahay matapos madestroso kan mga nakaaging bagyo. Ang mga nagbibista iyo ang mga magurang na karga ang kalintoradong omboy, asin daraga na sige ang piling-piling kan payo ta naibahan daa nin tawong lipod na gusto siyang agomon. Sa tubig na yaon sa planggana, nahiling ni Tiya Inya ang sarong Prinsipe sa kahadian nin mga Tawong Lipod na sige ang sunod sunod sa daraga ta ini daa kras niya asin gusto niyang presentaran sagkod na maagom, kung kaya ang daraga garong natuturek asin gustong magsakat sa kisame kan saindang harong. Kung ang ibang esperetista iguang pig hahagad na puting manok tanganing mapalayas ang tawong lipod, puwes si Tiya Inya iyo man ang pig hahagad , puting manok, alagad iguang PS, kung mayo daang puting manok, kwartahon na sana ta , si Jun na saiyang aki ang mahanap na sana nin manok sa sirong kan Supermarket. Kan magsirip ang mga aki sa ginigibo ni Tiya Inya na magbawi nin naibahan, duman ninda nahiling na nag babago asin nag iiba ang boses ni Tiya Inya na kahawig nin duwende. Ang kagayonan sana ki Tiya Inya ta an saiyang pasyente pig huhulitan na magpangadye nin sampolong Ama Niamo, bienteng Minatubod, asin trienta na Hail Mary. Saro pa sa magayon ki Tiya Inya ta habo niya maghagad nin bayad kung kaya gulpi ang naghahanga saiya ta siya makidiyos, alagad kadaklan sa mga pasyente nagpapawalat na sana kan inaapod na “panigarilyo” o “pagogom” tangani daang iggua man sana siyang magastos sa pagpa laboratory niya na Lunes. Kung kaya ang pasyente minapuli na lupiak man giraray ang pitaka ta nagwalat nin pampalaboratory kan esperetista, marhay na lang ta may discount ta senior citizen.