Si Tyang Soling, Intsika

Kaidtong mga dekada 70, iguang Lola na solo solo sanang nag aatender sa saiyang sadit na tindahan nin bagas sa may sirong kan Supermarket harani sa dalan pasiring sa bunuan nin orig. Siya si Tyang Soling, kan panahon na idto nag eedad nang labi sa 80 alagad marigmat pa ang isip, nakakalakaw pa asin tatao pa sa kuentada palibhasa saro siyang intsika.

Si Tyang Soling, mabooton na Lola, ini matinabang sa mga kinapobrehan na nakikilimos sa irarom kan Supermarket. Mataba asin halangkaw na babae si Tyang Soling na mahilig makipag istoryahan sa mga pobreng paratienda nin lemonsito, kamatis, sibulyas asin mga gulayon sa kalye Zamora sa irarom kan Supermarket. An parating kaulay ulay ni Tyang Soling sa lugar, iyo an mga paratienda nin mama-on arog kan buyo, bunga asin tabaco.

Minsan makaherak ang inabot ni Tyang Soling ta pinag aprobetsaran siya nin sarong holdaper na pinag purbaran pa siyang saksakon asin ini tuminama sa saiyang takyag. Sa saiyang pagpasiring sa tindahan sa pagka aga asin sa saiyang pagpuli sa pagkahapon saiya sanang pig lalakaw ang dalan papule sa Arana Santa Cruz. An mga tawo sa saiyang agihan nag mamano saiya ta saro siyang relihiyoso asin dayupot na Catoliko.

Panahon kaidto nin kariribokan asin pagtios sa China , kung kaya si Tyang Soling asin an saro niyang tugang na lalaki, ilinaog kan saindang mga magurang sa tiklis o idtong kaganan nin mga gulayon ta sinda madulag sa China asin mapasiring digdi sa Pilipinas lunad nin dakulang lantsa na pano-pano nin mga kababayan na madulag sa Tsina. Halawig na biyahe sa kadagatan ang saindang na experiencia ta ang importante kaidto sinda makadulag sa Tsina ta sinda gagaradanon asin ang Pilipinas iyo ang pinag tutubudan tuninong asin maogmang lugar.

An mga inot na instsik sa Naga City lalo na idtong mga naging Milyonaryo haros iyo ang kasarabay ni Tyang Soling sa pagbalyo pasiring sa Pilipinas. Dai naman naistorya kung papano sinda naka abot digdi sa Bikol. Arog kan kaugalian kan mga tsino, pobre sindang hilingon, mayong magayon na mga bado alagad ang saindang mga aki, nagdarakula duman sa Manila na iguang kanya kanyang Negosyo. Dai nanggad mamaluan na saro siyang intsika ta matibayon siyang magtaram nin bikol, asin matibayon magpangadye nin bikol. Si Tyang Soling iyo ang pinag bibisto kaidto sa Supermarket na tunay na ugaling bikolana, maboot, matinabang, maogmahon na kaulay asin mayong pinag oorgolyo Kundi ang kagayunan kan Kabikolan. Sa laog kan saiyang harong, mahihiling an mga imahen ni Jesukristo asin ni Nuestra Senora de Penafrancia. Aktibo siya sa mga programa kan simbahan lalo na kung panahon nin Kamahalan asin Pasko. Ang makadigdi sa Pilipinas sarong dakulang suerte nin arog nindang mga Tsino na pinag aapi kaidto sa saindang sadiring dagang tinubuan.