Siisay sa tolo?

An mga tambay sa SM, Robinsons asin mga coffee shops nagpupuon nang magpurustahan kun siisay ka Mayor Nelson Legacion, ex-Mayor John Bongat asin Tato Mendoza an magana sa eleksyon sa Mayo norong taon.

Mayong kasiguruhan kun siisay sa tolo an masunod na alkalde kan Naga pero an sierto y seguro an gabos sainda kampi ki Leni Robredo para presidente kan Pilipinas.

Iyan daa an dahilan kun tano ta si VP Leni nagpatukdok nin harong sa Magarao na dai man nagboboto sa mga kandidato sa ciudad nin Naga.

Bistado an tolo na kaalyado kan pamilya Robredo, si Tato Mendoza na nagmanehar kan Naga City Terminal sa halawig na panahon sa kagustuhan kadtong depuntong Jess M. Robredo, si ex-mayor Bongat an nag-alkalde kan Naga sa kagustuhan man guiraray ni JMR, si Mayor Legacion na nagpara Bise ki Bongat asin ngonyan iyo na an nakatukaw na alcalde kan City Hall.

May nagsasabi na si Bongat an magana ta marhay sa tao asin marhay an PR, may programa pa sa radyo asin nagtataong libreng servicio legal sa mga taga Naga. An campaign manager niya pati si Mrs. Farah Raṅola Bongat na aktibong marhay sa social media.

May nagtutubod naman na pakalihis nin tolong pag-porbar si Tato Mendoza magana na ngonyan na eleksyon ta gulpi pang kwartang pang-kampanya. Apuera kan magayon na Almeda highway na pinaguibo kan pamilya ninda yaon pa kasurog an mga bilyonaryong si David Consungi asin FF Cruz. Pirme pang gulping tao an famusong MPlaza na ngonyan nagkukuno-kuno naman nin mga kostumer lalo na an mga aki asin ina.

Pero ako personalmente nagtutubod na si incumbent Mayor Son Legacion iyo pa an magana sa Mayo 9 ta siya an incumbent, magayon an performance niya bilang anti-Covid warrior kasurog niya pa si Arsobispo Rolly Tirona asin ta kadakul kuarta an gobyerno lokal mantang an Naga igwa nin poco mas o menos sarong bilyon na IRA o Internal Revenue Allotment. Napagayon niya pa an Plaza Rizal asin an sidewalks sa centro kan Naga.

Maski sa pagka-Bise Alkalde bintahi pa si Nene Veluz de Asis. Magayon Seguro kun mag-debate si Nene kontra sa challenger na si Judge Zeny Najera Bragais.

Si Tots De Quiros maski bistadong broadcaster sa Manila asin naguin alkalde na sa Catanduanes pwede man magpartisipar sa debate.

Si Mrs. Bragais asin Mrs. de Asis magkasarabay sa colegio kan dekada 60-70.

Sa mga konsehales sa primerong pagkakataon burulyada na an ralaban ta an mga kandidato anas- anas man may kanya-kanyang balwarte, pero an mga incumbents arog ki Joe Perez, Lito Del Rosario asin Sonny Raṅola dakula an oportunidad na maka-iba sa top 10.

Si Oyeng Rosales bilang pinaka-juven pwede man guiraray mag-topnotcher.

An mga bagito arog ki Aries Macaraig, Eduardo Gregorio asin si General Omar Buenafe may guila-guilang makalaog sa magic 10.

Pero kwidaw kamo ta si Nathan Sergio, PWD, kandidato guiraray para konsehal pero suhay na ki Tato Mendoza. Solong naglalakaw sa mga harong-harong sa 20ng barangay tanganing magpaguiromdom na si Sergio kababayan sa Buhi ni Legacion kandidato na naman pero Independiente.

Nalibot niya an Naga kan naka-aguing 2ng pirilian ngonyan liliboton niya sa ikatolong beses.

Basta an segurado ko an mahigos magkampanya iyo an magana maguin para mayor, vice-mayor o city councilor.

Maogma an masunod na konseho kan Naga ta haralo-halo na pero gabos dating kolor yellow ngonyan kolor pink na (pati pisngi).