top of page

Siisay si Congressman Gabriel Hidalgo Bordado Jr ( Part II )



Unexplained poverty o dae maipaliwanag na pagtios an dalagan kan politika ni Gabriel Hidalgo Bordado Jr.


Amay na nailo sa ama na sarong ordinaryo alagad mataling maestro. Pinadakula siya kan saiyang ina na saro man na paratukdo pati an saiyang mga nguhod na tugang na gabos nakatapos nin kolehiyo na iskolar.


Mismo si Gabby iskolar kan Insular Life Company sagkod na magtapos nin kursong Agribusiness sa UP Los Baήos asin Diliman.


Si Congressman Bordado saro talagang parauma asin paratanum, nakadukot sa daga mala ta an saiyang libro na may foreword ni dating Vice-President Leni Robredo na may titulong “Tilling Fields” asin may mapa kan kadagaaan asin umahon na saiyang nasasakupan.


Pakagradwar college nagtrabaho siya sa Department of Agriculture ( Bureau of Plant Industry ) sa Pili asin sa Bangko Sentral ng Pilipinas sa Maynila antes mag EDSA revolution.


Saro si Gabby sa mga estudyantes na pighahangaan kan panahon duman sa Los Baήos arog ki Wenceslao Olager, William Balmaceda, Ramon Abracosa na nag-iinom beer mantang nag-aadal para sa mga exams sa masunod na aldaw.


Bako lang pasado kundi topnotcher pa sa eksamen an resultado. Iyan an kultura kan mga estudyante sa Los Baήos kan panahon. Bawal mag-adal pero nakakapasar. Dagdagan pa kan mga aktibidades, rallies asin demonstrasyones kontra sa gobyerno na naaangutan kan mga estudyantes asin mga juvenes kaidto.


Kan magka-igwang EDSA revolution kan 1987 si Engr. Jesse M. Robredo an nanombrahan na maguin program director kan Bikol River Basin Development Program (BRBDP).


Si Robredo na miyembro kan batch 74 kan Ateneo de Naga sa high school nahinghingan kan pangaran ni Bordado na maguin PRO/PIO kan BRBDP ta matibay magsurat mala ta an mga artikulo asin rawit-dawit niya napupublikar sa mga diyaryo asin babasahon nasyonal arog kan Philippine Star, Philippine Daily Inquirer, Malaya, Manila Bulletin, Who magazine, Philippine Graphics asin kadakul pang iba. Naguin radyo announcer pa siya sa Naga.


Kan igwang magprobar na magtukdul ki Robredo na sobreno kan sarong dakulang politiko si Bordado an nag-organisar kan grupo na ulangon an malaen na plano.


An mga empleyados/empleyadas kan BRBDP iyo mismo nagtindog sa puertahan kan opisina kaya dae nakalaog an ambisyosong saguin-saguin technocrat.


Magayonon na kuta na an dalagan kan opisina kan biglang ipasara an BRBDP ta idto daa proyekto pa ni Presidente Marcos.


Tamang-tama mapa-eleksyon na kan 1988 asin si Jesse Robredo an napiling kandidato ni Luis R. Villafuerte para alkalde kan ciudad nin Naga.


Si Gabby iyo man guiraray an PRO, spokesman o parapahayag kan 27 anyos na si Jesse M. Robredo. ( dae aram kan kadaklan sa likod kan mga pangyayari si Bordado iyo an namamahala sa mga tao, sa mga parakampanya, pati mga ibubugtak sa pwesto pakatapos kan eleksyon).


Sa Naga City Hall si Bordado pinag-sarong sekretaryo saka administrador alabis consultant kan bagong alkalde. Duman nagpoon an “Ubos kun Ubos/Gabos kun Gabos”. Pati an biglang pagsuhayan ni LRV asin JMR ta dinaog kan juven na Robredo an matuang tugang ni LRV na si Pura Luisa Villafuerte Magtuto na retiradong principal kan Camarines Sur National High School.


An mga taga- Naga nawaran amor sa provincia asin an provincia mayo nang pakiaram sa ciudad.


Mabibisto kun siisay si Gabby sa saiyang mga sinurat lalo na sa mga nakapalaman sa saiyang librong “Tilling Fields”.


Segun ki Leni si Gabby tultol asin disenteng servidor asin politiko.


Sinda ni Jesse an nagmukna kan konseptong good governance kan ciudad nin Naga.


Inako niya sa sarong intrevista kaya tinabangan niya si Robredo ta talagang maurag ini kaya man pigtiwalaan siya kan alkalde ta maurag man siya.


Liputok siyang devoto ni Inang Nuestra Seήora de Peήafrancia. Aram niya na na an ciudad nin Naga dating Ciudad de Caceres.


An Naga kadto kan panahon kan Kastila iyo an Tabuco, Tinago, Dayangdang asin Balatas.


An salog kan Naga na iyo an pig-aaguihan kan sakay ni Ina durante kan pista sa bulan na Septyembre iyo an inaguihan kan mga bangka kan mga Espanyol kan sinda mag-abot sa Naga kan 1575.


Si Gabby na maki-cerveza mahilig man magkape sa gurangan na restaurant sa centro na New China.


An poder dae minaluwas sa botelya kan beer kundi sa pagkua kan tiwala kan taong nasa poder, sabi niya pa.


Bago ki Leni si Roco ngona an da best President kuta kan Pilipinas alagad nasubi, sabi pa niya.


Tubod siya sa paguiguin simple arog ki Pogi aka Jesse Robredo. Katabang si Gabby an talagang iwinalat na legasiya sa pag-gogobyerno an malinig na pagpadalagan kan gobyerno sa haros 20 anyos na nagpagana saiya kan Ramon Magsaysay Award sa linya nin pag-gogobyerno lokal.


Naguin dati na siyang ganador kan Outstanding Young Men o TOYM of the Philippines.


Dipisil pero nahimo niya na masaro an non-government organizations asin People’s organizations.


Namukna niya an Urban Poor na magka-igwang marhay asin malinig na estada an kinapobrehan kan Naga.


Napasaro niyang maguin mag-amigo an media asin lokal na gobyerno na mayong turodukan.


Sa parte ni Gabby an iba sa mga paborito niyang tema iyo an politika sa likod kan jueteng, an politikong parauma, an mga sira sa danaw kan Buhi, an naghihinagdan na industriya kan abaca, an pagsalbar kan bukid Makiling, Bicol Express (PNR), an mga palaban na diyaryo lokal, an pagbalinghaw kan bulkan sosyal kan Bikol, an daeng katapusan na pagtios kan kinapobrehan.


Sa lado internasyonal an saiyang idolo iyo si Barack Obama, an primerong itom na president kan USA asin si dating first lady Hillary Rodham Clinton kan America saka si spin doctor na si Jorge Stephanopoulos. Garo dae siya bilib ki Bill Clinton, agom ni Hillary, ta mahiro sa apparatus.


Idolo niya man si Pacman, boksingero bakong karatista na bukas an palad saka an boss of all bosses kan panahon sa city hall na si Satoichi, the blind swordsman.


An saiyang paboritong parasurat iyo si Nick Joaquin aka Quijano de Manila na saro man maki-cerveza, Benvinido N. Santos, Ilokanong Bikolano, Luis Cabalquinto, pararawit-dawit na taga-Magarao, apuera lugod ki Carlos P. Romulo, primerong Presidente kan UN General Assembly asin dating sekretaryo kan edukasyon y presidente kan UP huli ta nagpagamit daa ini ki FM.


Tagahanga man siya ni Ernest Hemingway, an adventuristang parasurat.


An saiyang mga diskurso sa kongreso clasico. An mga sinurat niya na mga rawit-dawit lalo na sa English espesyalmente an saiyang mga tankas hararom asin pambihira.


Kan halawig na panahon kan siya naguin konsehal asin Bise- alkalde kan Naga para mayor na kuta biglang naghabo ta mayo daang kuarta asin may mati-mati na daa siya pero naguin lugod Congressman tolong turno pa asin garo siya si David na dinaog niya si Goliath sa persona ni Luis Robredo Villafuerte Sr, an hade kan presenteng dinastiya.


Si Gabby Bordado lang an nakakabisto kun siisay an misteryoso asin milagrosong si Gumersindo B. Valladolid kan Vox Bikol.


An hapot ngonyan na matatapos na an saiyang turno asin ngonyan saro nang deputy minority floor leader: pasiring na saen si Gabby Bordado?


Sierto y seguro mas halangkaw pa, mas dakula an saiyang padudumanan bako lang sa vida politika kundi sa mas importanteng misyon sa buhay nin Bikolano, Pilipino asin namamanwaan.


Dae niya pig-plano pero siya naguin Congresista, harayo sa saiyang kaisipan pero dae daw siya maguin masunod na alkalde kan ciudad nin Naga?

Comments


bottom of page