top of page

Siisay si Gabriel Hidalgo Bordado? (Part 1)



Taga Calabanga, aki nin mga matataling paratukdo, iskolar sa Ateneo asin sa UP asin matibay na parasurat, orador asin inako niya mismo na siya sarong propagandista saka maki-cerveza kaidto.


Siya an nag-guibo ki Mayor Jesse M. Robredo asin si Mayor Robredo saka an saiyang agom na si Leni Robredo iyo man an nag-guibo ki Gabby.


Sa Ateneo pa sa high school sikat na siyang parasurat bako lang sa English kundi pati sa Bikol, saro na siyang orador na pig-aaraan kan saiyang mga kaklase.


Kaya an Robredo saka Bordado saro sanang tono.


Nag-eskwela sa UP Los Baήos, duman niya nabisto an saiyang magayon na esposa na si Gina Junsay PhD, primerong babaeng Presidente kan Central Bicol State University of Agriculture, (dating CSSAC), si Gabby napiling pamayo kan mother chapter kan Sarong Banggi organization kan dekada 70.


Pakatapos niyang kolehiyo sa universidad de estado si Gabby nagpuli sa Bikol asin nagtrabaho sa Departamento de Agrikultura alagad amay na parte kan dekada 80 nagtrabaho siya sa Banko Central sa Manila. Paka-EDSA Revolution nagbwelta siya guiraray sa Bikol asin tinabangan an bagong director kan Bicol River Basin development Program na si Jesse M. Robredo. Pignumbrahan siyang PIO kan pinaka-sikat na ahensiya kan panahon na idto.


Duman palang nabisto na an pangaran ni Robredo bilang matibay na director huli kan saiyang PRO asin parapahayag. Kan mag-election kan 1988 si Jesse Robredo nag-decider na magdalagan bilang alkalde kan ciudad nin Naga asin arog kan piglalaoman iniba niya si Bordado sa kampanya kaiba an dakul pang ibang taga-BRBDP na anas piling-pili, mahihigos asin matatali.


Sa sarong pribadong orolay inako ni Bordado na tinabangan niya si Jesse M. Robredo ta talagang matibayon ini.


Si Bordado batch 71 sa Ateneo high school si Robredo HS batch 74.


Bilang alkalde kan Naga guinibo ni Robredo si Bordado enot sekretaryo kan ciudad, ikaduwa administrador, konsehal asin Bise-Alkalde.


Gusto kuta na ni Mayor Robredo na padalaganon mayor si Gabby pero nagsayuma ini ta mayo daa siyang kuarta asin maluya an saiyang salud. An sabi kan iba kun nanguyog kadto pa siya naguin alkalde kan Naga.


Sa dae inaasahan na pangyayari si Jess binawian nin buhay kan 2012. Nagkandidatong congressman si Leni asin nanggana. Imbes na magre-election pinadalagan siya ni Presidente Aquino para Bise-Presidente asin nanggana si Leni.


Si Gabby na habong mag-mayor naguin Congressman tulong turno pati asin Giant Killer ta dinaog niya si LRV.


Ngonyan matapos na an saiyang turno, ano an masunod na kabtang kan saiyang vida politika? Maretira na? o sabi kan iba makandidato sa ciudad nin Naga?


Siisay na an masangli saiya sa congreso mantang siya deputy minority floor leader duman asin saro sa pinaka-brilyanteng orador kan camara de representantes?


Antes kan barangay asin SK election sa Naga asin Camarines nagpopoon nang mag-porormahan nin linyada.


Antabayan an masunod na kabanata.

Comments


bottom of page