Sikat na local vlogger dakolang inspirasyon sa mga netizens

Ni Sonny Malate

Padagos na nagseserbi bilang  dakolang inspirasyon sa mga netizens an vlogger sa social media na gamit an pangaran na Kuya Renan,  sarong residente kan sarong banwa sa Partido Area. 

Segun ki Kuya Renan na Renan Pasiona Abella an completong pangaran, 34 años,  nagpoon siya sa pagvlog kan taon 2020, durante kan panahon kan Covid Pandemic na empleado siya sa sarong call center sa Manila.  

Huli sa kahaditan asin takot sa pandemic asin  pungaw sa pamilya sa Bicol dara kan  travel lockdown, an atencion ni Kuya Renan  nabaling  sa macolor na mundo kan mga vlogger.  Sa ngonian, nakabase na siya sa Partido Area, mayo nang regular na employer alagad may ganada huli sa tamang "diskarte".

Segun ki Kuya Renan  na an piniling branding sa sadiri bilang vlogger iyo an "tambay na may pangarap", an principio niya sa pagiging vlogger iyo an  makaheras nin inspirasyon, motibasyon, edukasyon asin kaalingan sa mga netizens.

Sa presente, pambihira na nakaabot na sa 2.2 milyon an saiyang followers, saro sa mga Bicolanong vlogger na may milyones na followers,  arog ni Boss Ka-Reppa. May mga veces minaabot sa milyones an mga viewers sa sarong video post ni Kuya Renan. 

Huli ta  saro nang  bistadong  vlogger,  siya an parating namimidbidan sa mga pampublicong lugar na pigduduman ninda kan saiyang esposa, may pira nang product endorsements asin may nagugunong bulanan na monetization na "secret' kun gurano. 

Pig-ako niya na an atencion na pigtatao sa saiya kan publico nakakapataba sa puso, alagad soboot nakatuntong man giraray sa daga an saiyang duwang bitis. Pigtawan niyang doon na an popularidad o financial reward sa pagiging vlogger bako an dapat motibasyon kan sarong content creator o media influencer.

Segun sa vlogger,  personal niyang pagtubod na an sarong content creator dapat magheras nin  kaogmahan asin marhay na virtud o moral values asin dae maging ahente nin fake news, kararatan, kadustaan asin negative vibes.

An mga content na nagluluwas sa vlog kan sarong Kuya Renan na yabyab an t-shirt, sabukrot an buhok, medyo maniwang asin tipo an sarong ngipon  iyo an madalahay na monologue sa lengguaheng Filipino na minsan may kahalong English. 

Pasuba, paconsuelo, sarcastico asin paagyat an pagpresentar kan content niya dapit sa pang-aroaldaw na situacion sa buhay. Sa kadaklan na veces an viewer  napapangirit, naiintriga asin naiinspirar digdi huli ta ini salming kan saindang totoong buhay.

Apwera sa dae nagraraway an vlogger   sa mga content niya, habo man niyang  magpromote nin sugal dawa gurano pang talent fee an karibay. Segun sa saiya, ini nin huli sa marhay na pigtaong ehemplo kan saiyang mga magurang.

Kan mga nagtalikod na semana, an progreso kan pagpaconstruir  kan saiyang sadit sana pero concretong harong pigtampok sa paagi kan "Bahay Serye" post sa saiyang vlog. Dakolon an nagunong reaction asin views kan serye. May nabigla, naintriga,  naogma asin  nainspirar na posibleng  sa paagi kan pagvlog nakapagibo nin concretong harong si Kuya Renan. 

Kan hinapot kan Bicol Mail kun totoo na sa paagi kan pagvlog siya  nakapatugdok nin  harong, an saiyang simbag: "Sa sarong banda iyo asin kairiba na an sakong diskarte sa pagiging "tambay na may pangarap," sabay huyom.

Sa maabot na Pasko, si Kuya Renan matao nin kaogmahan sa mga pagtaraid kan saindang residencia sa paagi nin pagheras nin nochena buena package, kawatan para sa kaakian asin iba pa. Ini bilang pasasalamat niya sa Kagurangnan na dayaday an biyaya sa saindang pamilya.