SimEx sa mga escuelahan sa ciudad nin Naga laban sa ‘gun violence’

Ni Paulo DS. Papa

KATAKOD kan National Crime Prevention Week sa enot na semana kan Setyembre, gigibuhon an koordinasyon kan Naga City Police Office sa mga eskwelahan sa syudad tanganing gibuhon an mga aktibidades na may kinaaraman sa violencia dara kan badil o gun violence.

Kabale na digdi an sarong Simulation Exercise kun saen tutukduan an mga estudiantes, magin an mga barangay officials, nin mga dapat asin marikas na aksyon enkaso mangyari an school shooting na nanutaran na sa San Jose National High School sa syudad nin Tacloban sa Leyte kan Hunyo asin Ateneo de Zamboanga University sa syudad kan Zamboanga, ngonian na bulan.

Si PLTCOL Elmer Azurez Jr., an pamayo kan City Community Affairs and Development Unit (CCADU) kan nasambit na opisina nagsabi na susug sa nagin koordinasyon kan Departamento de Education, magkakaigwa nin nagkapirang mga dayalogo dapit sa crime awareness magin kan nasambit na ehersisyo sa nagkapirang mga eskwelahan sa studad kabale na an Ateneo de Naga University, Balatas National High School asin iba pa.

Katuwang an Special Weapons and Tactics (SWAT) asin Provincial Mobile Force Company magin mangiba-ibang hepatura nin pulisya sa syudad nin Naga.

Kabale na sa magigin highlight kan Simex iyo an initial actions sa mga kaduda-dudang mga persona magin mga hiro-hiro sa laog kan school campus, tamang pagtago asin self-defense sa mga sitwasyon orog na kan school shooting.

Bago pa gibuhon an mga aktibidad kasumpay kan National Crime Prevention Week, igwa na nin nagkapirang mga pagtiripon an PNP-Naga asin mga manihamentos kan escuelahan kasumpay kan precautionary measures laban sa ano man na biyolensya sa laog kan eskwelahan.

Iyan tanganing maaraman kun arin sa mga escuelahan sa Naga an gigibuhan kan Simex.