Simple Office, Simple Christmas

Dai man nanggad dapat ipag ngalas alagad puede sanang ipang istorya an kaibahan kan kinaban kaidto sagkod ngonian. Harayoon nang marhay an buhay sa Naga kun ikukumparar sa mga nakaaging panahon. Nakalunad ako sa magayon, malinig asin mahamot na “pick up” ni amigong Randy Sto. Domingo mantang pig aagihan an mga mayor na tinampo kan Naga na yaon pa an ma tada-tadang basura, laboy asin alokabok, sa halipot na pagtaram, an Naga bako pang maayahay na pasyaran ta dai pa kumpleto an kalinigan gikan sa mapag perwisyong pagbaha dara ni Kristine. May kadikit na pagluha sa saiyang mga mata, kan mamutawi sa ngimot ni Randy an mga tataramon na, nagigiromdoman niya an kaogmahan nin simpleng buhay sa Naga na maski sain ika magparada nin lunadan puede asin malinigon an kapalibotan. Duman nag balik sa sakuyang memorya an sadit na oficina na inot kong naging empleo, ini an Clavecilla Radio System, na an negocio iyo an telegrama. An samuyang oficina yaon sa kanto kan Elias Angeles sa atubangan kan Ramaida Centrum. An sukol kaini mga 3x4 sqm, igua sanang duwang lamesa asin sadit na radio room na iyo an kinamumugtakan kan morse code tanganing magpadara asin magresibe nin telegrama. An sakuyang trabaho iyo an bike messenger asin minsan reliever nin morse code operator. An samuyang Manager iyo si Mrs. Eden Malaluan Regalario, tubong Capalonga, Camarines Norte. Siya an esposa ni Carlos Regalario na sarong opisyal nin mga embahada kan Pilipinas asin ultimong nagretiro sa Consular office duman sa Washington USA. An mag agom duman na permanenting nag iirok sa Virginia asin maogma kaiba an mga aki asin mga makuapo. Paminsan minsan nagbabalikbayan sinda Caloy asin Eden Regalario ta dai ninda malingawan an Bicol lalo na an Naga City ta digdi sinda nagka inaguman. Si Carlos Regalario tubong Oas Albay sa sarong familya nin mga musikero ta an saiyang Ama iyo an pamayo kan Orkestra na inaapod Pee Wee. Alagad inot nagtrabaho bilang maestro sa Ateneo asin Holy Rosary Seminary mantang si Eden Malaluan naging instructor sa University of Nueva Caceres. An samuyang oficina, sadit sana alagad maogma ta garo kami magturugang mala ta kun panahon nin pasko, simplehon sana an samuyang Christmas Party. An samuyang handa, iyo an sinuman na iguang tutong sa ibabaw, igua nin bihon asin sliced bread na may masiram na palaman, siempre igua nin softdrinks. An maogma sa Party iyo an Manito Manita na antes itao sa manito an regalo obligado ika na magkanta nin sarong Christmas Song. Mayo pa kaidto nin kamera asin cellphone, an gabos simple sana, mala ta sa pagtapos kan Christmas Party, kanya kanyang baklay, ralakawan papule sa harong ta mayo kami nin mga awto. Ngonian na 00panahon sa kada pag abot nin Christmas, nag oorolay kami sa messenger ninda Eden asin Caloy hali duman sa harong ninda sa Virginia, haros mapaturo an samuyang mga luha sa pag giromdom kan simpleng oficina asin simpling Kristmas, an nakaagi saro na sanang memorya na ipinapaagi sa istorya. Ngonian na maabot na Christmas yaon man giraray an kaogmahan lalo na kun malinig na an kapalibotan sa Naga.