Simpleng Aguinaldo sa mga Pobre

Naoogma ako na maaraman na may mga tawong nagheheras nin tabang sa ibang pobre maski sa kadikit na paagi. Si Cyril Salvo, miembro kan CSNHS Batch 76, na ang mga magurang tubong Bongalon, Sangay an dai nanggad nakakalingaw na mag waras nin pang Aguinaldo sa mga kababaryo sa kada ika 24 na Decembre. Si Cyril Salvo, maogmang nag e-erok kaiba an familia sa cuidad nin Taguig magpoon pa kan 1976 pagkatapos sana kan high school. Tuyong Pasko, pinapadarahan nin pang aguinaldong regalo an perong gatos na residente kan Bongalon asin an kataid na patitinan sa banwaan nin Sangay. Maogma para ki Cyril an mahiling na maogma an saiyang mga kababaryo maski sa sadit sanang makakayanan. Ako mismo iguang maogmang experiencia sa Bongalon, ta kan ako aki pa asin dai pa nag e-eskuela, dinara kaming tolong magturugang sa Bongalon para sa perang aldao na bakasyon sa familyang Salvo (magurang ni Announcer Fiorel Salvo). Ninang ko sa bunyag si Hilda Salvo Arieta (naging empleada kan GSIS), aki ninda Zoilo asin Tinay Contacto Salvo. Nagiromdoman ko an samuyang inumon na tubig pig sasalud sa sagurong na hale sa bukid alagad idto malinig asin masiram, minsan sa paglakaw lakaw ko sa mga kakahuyan, igua akong nasabatan nin dakulaon na lalaki barabason pero dai naglalakaw kundi ini nag ka-kamang na huna ko sarong baboy damo. Sabi kan mga tawo sa Bongalon, an lalaking idto iyo si “kamang” ta dai siya nakakalakaw imbes kamang an saiyang ginigibo sa pag libot sa baryo. An magayon na nahihiling ko sa Bongalon iyo an kasaganaan sa pag sira kan mga tawo, ta aga-aga pirming may pasalubong nin mga dekolor na sira an mga paralawod sa mga tawo na naghahalat sa baybayon. An baybayon kan Bongalon yaon sa ibabang parte kan Isarog, kaya tinatanawan ko an mga awto kan Alatco na nag hahangigilid sa itaas na tinampo ( ngonian highway ini pasiring sa Tiwi). Si Announcer Fiorel Salvo minsan naka istorya na kaidtong panahon nin kastila, an interong isla kan atulayan kaatubang kan Bongalon minsan pang naging pag rugaring kan saindang mga ninuno base sa titulo nin lote na nakasurat pa sa lenguaheng kastila.

Si US-Vietnam war Veteran Mr. Wood Kan Virginia USA alagad may harong sa Barangay Carolina ( Carolina White House), siguradong nag mumundo ngonyan dduman sa America ta dai sinda nakakapuli sa Pilipinas huli sa pandemia. Si Mr. Wood, 80 anyos, naka pangagom nin taga Carolina. Inot sindang nag istar sa America alagad nag retiro digdi sa Carolina. An saro sa dai malingawan ni Mr. Wood na maogmang buhay sa Carolina iyo an pag pila nin mga pobreng aki sa luwas kan saiyang gate tuyong Deciembre 24 para mamasko. Naging ugali na kan mag agom na mag andam nin pang regalo sa mga pobreng aki ta arog ni Cyril Salvo, an magduhol nin tabang maski sadit na bagay, maogmahon sa pagmati. Para ki Mr. Wood daing kapantay na kaogmahan an mga ala Santa Claus sa Carolina ta an mga tawo digdi pig bibisto sindang Lolo asin Lola na garong sadiring tawo, kaya mas pinili niya an mag retiro digdi sa Naga. Si Mr. Wood orgulyong pig sabi na digdi siya nakanood mag tanom nin mahamis na manga asin pili. May kasabihan it is better to give than to receive. Happy New Year.