Sinangat na mga COC iginilid na kan Comelec

Iginilid na kan mga opisina lokal kan Commission on Election (Comelec) sa Camarines Sur an pigsumiter na mga certificate of candidacy (COC) matapos permahan ni Presidente Ferdinand Marcos Jr. kan Septiembre 28, 2026 an Acta Republica 12326 na nagtatalaan sa limang taon na termino kan opisyales de Barangay asin Sangguniang Kabataan.

Epecto kaini pig-uktaba na si nakatalaan na Barangay, Sangguniang Kabataan Elections envez na gibohon sa Noviembre 2, 2026 pigtalaan sa ika duwang Lunes kan Noviembre 2028.

Kan Septiembre 28, 2026 iyo si enot na aldaw kan pagsangat nin COC sa Comelec alagad mabigla si mga asperante kasunod kan saindang amay na magsangat nin candidatura.

Sa Ciudad nin Naga, sinabi ni Atty. Maico Julia Jr., Election Officer digdi nagsabi na dakul nang nakasumiter kan saindang COC si mga candidato sa Barangay asin SK.

Nanghinayang an mga opisyales kan Comelec huli kan saindang mga pag-andam asin milyones pesos na nagastos alagad sinayang sana kan gobierno.

Alagad sinabi ni Julia na mayo sindang magiginibo masunod sa gobierno nasyonal asin sa directiva kan saindang opisina sentral kan commission.

An ibang mga asperante nagsabi na dapat pinadagos an pirilian envez pakatapos kan eleksyon sa Noviembre 2, 2026 si pakatapos kan saindang termino, iimplementar na an limang taon na termino kan mga barangay asin SK officials.