Single ticketing system kan LTO poponan sa Naga

An Ciudad nin Naga iyo an magiging pinakaenot na lokal na gobierno sa Bicol na posibleng mag-implementar kan single ticketing system sa mga nagbabalga sa ley trafico matapos kan ginibong Memorandum of Agreement (MOA) signing kan LTO-LGU Interconnectivity.

Sa entrevista kan Bicol Mail ki Director Noreen San Luis-Lutey kan opisina sentral kan Land Transportation Office an MOA signing sa City Hall ginibo dai palang nahahaloy alagad hinahalat nalang kun nuarin an ‘‘timeline’’ kan ciudad kun nuarin iimplementar.

Si Lutey iyo an utak kan single signing system na pig-iimplementar na sa mga municipalidades kan Metro Manila Development Authority poon kan Agosto 15, 2023 mantang nagsunod man an ibang ciudad sa nasyon.

An proyekto planong ipasunod sa iba pang lugar na magdedepende sa kasundoan kan LTO asin LGUs.

Sinabi pa an proyekto dai na kukumfiscaron an lisensya kan madadakop na nagsisinutil na tsuper sa ley trafico alagad susunodon na sana an multa base sa traffic ordinance kan LGUs.

Alagad envez kan pagkumfiscar kan lisensya iisuyhan nalang nin ticket kan traffic enforcer na mabayad na sana nin multa asin puedeng magdirekta na ibayad sa bangko. Afuera kaini, direkta nang ililista sa opisina kan LTO para sa provisional alarm.

Nganing daing problema sa mga motorista dapat magsunod sa mga regulasyones sa trafico mantang katuyohan kan ahencia na malikayan an isyu sa korupsyon, sabi pa kan LTO. (dpa)