SINOPHOBIA

Nag-ngingirit ako sa mga pigdadalan o pigdadangog kong bareta aro-aldaw sa TV, sa radyo, nababasa sa mga diyaryo asin social media na garo baga mayo nang ibang pinaka-maraot sa ibabaw kan kinaban an mga Tsino o mga Intsik.

An isyu o bareta dapit sa South China Sea o West Philippine Sea na apektado kuno an soberiniya kan Pilipinas ta nasasakupan kan Tsina, pigdadaog-daog pa an satong mga parasira asin garo baga mapoon na an giyera mundial numero III bako sa Rusya asin Ukraine, bako sa Israel laban sa Iran asin Hamas kundi digdi mismo sa bangbangan ta sa may harani sa Taiwan digdi sa parteng Northern Luzon asin sa parteng Zambales sagkod duman sa Palawan.

Mayo pa si Magellan may mga Intsik na sa manlaen-laen na islas kan satuyang archipelago ta nag-nenegosyo na sinda digdi. Sabi kan Obispo kan Manila kadto an naguiribo asin nagharaman daa kan mga lumang simbahan kan satuyang nasyon poon Manila, Cebu, Bikol asin iba pa mga Intsik ta mga maorop bakong arog kan mga Espanyol/Kastila na mga hugakon na nagtutururog paka-pangudto tanganing mag-siesta abot alas tres nin hapon imbis na magtrabaho tulos sa mga konstruksyon.’

Mangalas pati kita ta igwa nin China Town bako lang sa Manila asin Naga (Tabuco). An Binondo sa Manila an saro sa pinaka-gurangan na China Town sa bilog na kinaban maski sa America, sa Europa, sa Australia, sa Africa, sa Canada etcetera, etcetera.

Sa Pilipinas an mga negosyante bako lang sa mga ciudad kundi pati sa mga banwaan mga Intsik pa.

Digdi ngani sato sige an iriwal kan mga Singkit huli ta an iba haling mainland asin an iba haling Taiwan puro makakauarta asin marhay sa negosyo.

Sisay daw an nasa likod kan iriwal na iyan asin pakararaotan?

Ipangadie nyato na dae magka-igwa nin kariribokan asin madugong bakbakan sa kinaban kundi arog kan inaasahan an iriwal parte sana kan negosyo asin dapat mayong katibaaran dakul an magkagaradan sa ambos lados, damay kitang mga Pilipino.

Nag-iwal an America asin Tsina huli kan isyu kan Taiwan.

An duwang nasyones an pinaka-mayayaman sa bilog na mundo. Ano pa guiraray an pinag-iiriwalan, armas, parareha pasiring sa bulan, pararehang pasiring espasyo, o papurusugan ekonomiya?

Kadto an Tsina pig-aapod sanang Bamboo Curtain ta walat na marhay an ekonomiya. Nagkakagaradan pa sa gutom an mga rinibong tao duman dahil sa pagtios.

Ngunyan bako nang bisikleta an piglulunadan kan mga tao kundi mga auto o kotse na, magagayon pa asin mamahalon. An mga tao haros gabos may trabaho asin industriyalisado na an Tsina.

Seguro kita magdalan sana kan saindang mga propaganda sa TV, sa radyo asin sa social media.

Dae kita ma-stress o mahadit o makunsume sa nagruruluwas na bareta ta garo an mga iyan mayo man kaabtan kundi pagpara-pahaditon sana kita sa ngaran nin negosyo, propaganda asin politika.

Sige an padakul nin tao maguin sa Sirangan o Sulnupan, maguin sa America o sa Asya. Pabuelohon ta sana, dae kita nungka magpa-apektar kan saindang mga iriwal ta kita an lugui kaiyan. An Pilipinas nagpapatrangkilo sana.

Katrangkilohan lang ngani an gusto kan ambos-lados, magtrabaho, mag-orogma asin magpakadakul kita.

An Mahal na Diyos sa itaas an maoogma.