SIPOCOT SUNDO SA RAGAY, CSUR: Mga relis kan perrokaril padagos an rehabilitasyon

Perang bulan na an ginigibong pagpakarhay kan mga linya sa perrokaril haling Sipocot pasiring sa Ragay, Camarines nganing makaantos digdi an viaje alagad sa pagtubod kan ibang sektor na posibleng marealisar na pasiring sa Manila nurong taon harayo pang mangyari.

Ini an pahayag kan ibang opisyal sa manijamiento kan Philippine National Railways (PNR) digdi sa Bicol sa tahaw kan ginibong ika-apat na State of the Nation Address (SONA) ni Presidente Ferdinand Marcos Jr. kan Hulyo 28, 2025 na an mga pig-iimplementar na mga proyekyo sa infrastractura tataposon sa laog kan saiyang termino.

Sa PNR Bicol, sinabi kaini ‘‘An mga riles ng PNR Bicol Line na sinira ng bagyong Kristine ay unti-unting pinapatibay at naaayos na, kasama na ang Binahan Bridge. Hindi magtatagal, madadagdagan pa ang haba ng linya nito, at aabot na sa Ragay, Camarines Sur hanggang Tagkawayan, Quezon,’’ sabi ni Marcos.

An rehabilitasyon sa mga linya kan PNR dati nang naka-plano sa dating administrasyon ni Presidente Rodrigo Duterte mala nagkaigwa na nin survey kan 2018 alagad dai na nadagos si contract agreement sa China sa administrastyon ni Marcos.

Magigirumduman si Bise Alcalde Gabby Bordado kan Ciudad nin Naga kan siya incumbent pa komo congressman sa tercer distrito kan Camarines Sur sa saiyang press statement sa miembros kan media sa Manila na nagluwas sa Philippine Daily Inquirer kan Hulyo 13, 2023, saiyang hinagad ki Marcos na dapat tawan na nin prayoridad an ‘‘revival’’ kan PNR project sa Bicol, nin huli ta dakulang bagay ini sa ngaran na pag-uswag sa economia asin pag-asenso kan rehiyon.

Si Bordado iyo pa kaidto an House Minority leader nagsabi pa na importanteng marhay na ibalik na an viaje kan PNR Bicol-Manila para sa progreso kan rehiyon Bicol na magagamit pa sa pagtransportar kan mga produkto agricultura asin iba pa.

Dinagdag pa kan PNR Bicol sa ngunian igua sanang sundo sa 140 kilometros an saindang nagagamit na linya sa target na dapat 478 kaya ngani padagos an saindang rehabilitasyon kan mga linya digdi sa Camarines Sur asin Albay. Nagbukas na sinda nin bagong PNR Station sa Pili, Camarines Sur asin sa iba pang lugar asin target naman an Lupi sundo sa Ragay, Camarines Sur.

An ruta sana kan saindang commuter train Naga-Legazpi asin Naga-Sipocot.