Siring sa Poon nin Kahoy

Ang pagtalubo o growth sa perspektiba kan mga pananom, pirming pasakat – paitaas. Mayo pa man kitang nadangog na nagtalubo nin palipot ang padalagan. Nagtalubo ang pagsadit kan tinanom o ano man na bagay.

Duwang orolay ang mainit ngonian na mga bulan, enot ining Super El Nino na natungkusan ta na kan mga nakaaging kolumn digdi. Ikaduwa ang satong direksiyon bilang ciudad sa pagiging Highly Urbanized City (HUC).

Sa sarong pagtiripon kan nakaaging Biernes, naimbitaran ang saindong lingkod magseribi bilang saro sa mga panelists kan forum na inorganizar kan Cooperatives and Agriculture Sector nin Naga City People’s Council para olayan ang duwang nasabing isyu.

May mga naghapot kung ano magiging implikasyon kan pagiging HUC sa sektor kan agrikultura, sa mga motorista, asin iba pang sektor. Igua man nagpahayag nin opinion na bakong kasiguradohan ang pagiging HUC na magiging marhay na ang buhay kan kada ciudadano.

Mga marhay na punto asin pananaw. Si simbag ko sa naghapot sako, dakula ang implikasyon kan pagiging HUC ka Naga. Land conversion na parte kan progreso na kaipuhan bantayan na maray, seguridad sa pagkakan kan mga pamilya, asin ang seguridad sa kita kan mga paraoma na iyo na mismo ang magiging rason nin dai pagbenta kan saindang mga tanuman.

Mayo dapat mawalat sa pag-angat kan kada saro bilang bentahe kan pagiging sarong HUC, kaya nanggad dapat balanse ang pagtao nin atensyon ta sa urbanisasyon asin sektor agrikultural.

Sa mga kabisto kong nakaolay manungod digdi, may mga nagsimbag YES, may mga nagsimbag NO. Marhay na resulta ini para sako. Ang importante naghihinimbang kita asin naghohorop-horop kung ano man nanggad ang ikakarahay kan direksiyon asin desisyon na ini.

Para sa iba, sarong estado ang pagiging HUC alagad dakul pa man giraray nin mga angat na aatubangon kaibahan ang tanos asin makusog na pag-gobernar kan ciudad, ang disiplina kan kada constituente asin ang pag-ahon sa pagtios kan mga mas nangangaipo.

Totoo, bako man “auto-ahon” o “auto-ginhawa” ang itatao kung HUC na kita. Mayo man nin insigida sa linalaog ta.

Para sako, ang paglaog ta sa pagiging sarong HUC, siring sa poon nin kahoy na nagbubunga nin prutas asin pinapakinabangan bako sana kan nagtanom kaini kundi sim ga nagsisirong sa lindong asin nag-guguno asin nagkakakan kan mga prutas kaini.

Sa pagagi kan panahon, mga nalampasan tang bagyo, baha, linog, sulo asin ano pa man na mga kalamidad. Uminabot na kita sa edad, siguro matured naman kita bilang sarong ciudad, handa naman kita sa linalaog tang desisyon. “No way to go but up!” ang sabi kayan.

Bako ining tono nin kayabangan o kahambugan kundi pagtubod sa satong kakayahan. Handa na kita. Uya na, nakahaon na, pakinabangan ta ang oportunidad.

Balikan ta si huring orolay ta digdi na ang uso ngonian bako nang “time is gold” kundi “timing is gold” lalo na sa lado nin negosyo o marketing. The perfect time is now and the best decision is YES.

Importante nanggad na magpartisipar kita sa pagdesider para sa padangat tang ciudad. Hirilingan kita sa maabot na Noviembre 21!