SIX FEET BELOW THE GROUND

Tigsik ko an ngaran na kagadanan

Sarong katotoohan, dae madudulagan

Sa kinaban, paenot-enot lang

Mag-enot ka na, gusto ko pang mabuhay!

Tigsik ko an buhay sa kinaban

Madali sana, minaagi lang

Mabuhay nin matanos aroaldaw

Dae mahaloy babawion kan Kaglalang!

Tigsik ko ining satuyang buhay

Sarong regalo kan Kagurangnan

Dàe paglaspagon, pakaingatan

Romdomon: SARO SANA AN SATONG BUHAY!

Tigsik ko man an kapeng masiram

Kaibahan mo hasta sa huring aldaw

Dae ka nanggad po babayaanan

Banggi o aldaw yaon sa saimong lamay!

Tigsik ko man ining puting balloon

Daog an kape, ini mas oragon

Iibahan ka hasta sa panganuron

Mientras na nakahuyom ka sa laog kan kabaong!

Tigsik ko an totoong katuninongan

Kun pagal ka na digdi sa kinaban

Kun an hanap mo kapahingaloan

CHILL. Maghigda ka SIX FEET BELOW THE GROUND!